Kapugngan pa’y baha

Gilagdaan na ni Presidente ang Republic Act 11596, ang balaod nga giingon’g motapos sa mga “child marriages” sa Pilipinas pinaagi sa pagdili na niini.  Ubos sa maong balaod, matawag nga “child marriage” ang usa ka kaminyoon kon ang bana o asawa o ba kaha silang duha nagpangedaron pa og ubos sa 18 anyos.  Gidili sa maong balaod ang pagpakasal o pagpahigayon sa kasal sa mga menor de edad, apan wala gidili nga magmabdos ang maong “bata”.  Dili kaha modaghan ang gitawag nga inahan apan dili asawa niining kalakiha? Kay ginaingon baya nga “Kapugngan pa’y bahâ, nungka ang bigâ”.  Madahaaan!

Minimum nga suholan

Nanawagan si Senador Manny Pacquiao sa administrasyon nga lutoson kadtong mga pribadong hospital nga nagdumili paghatag sa ilang mga empleyado sa hustong suholan. Niining maong panawagan sa senador, dili kaha maunay mismo ang gobiyerno?  Daghan trabahante sa kagamhanan nga gawas sa ubos sa minimum ang sweldo, wala pa gayod sila’y seguridad sa ilang panarbaho.  Angayan na ipatuman ang sugyot nga “Kon buot kita nga adunay dali nga kausaban sa pangagamhanan, ibutang sa minimum nga suholan ang tanang poliiko.” Fezteleern!

Outsiders not allowed

Dili na motudlo si Presidente Duterte og gikan sa gawas nga ihulip sa posisyon nga mabakante diha sa ehekutibo kon ugaling adunay mo-demiter, hinunoa, ang opisyal nga sunod ang ranggo na lang sa maong ahensiya maoy iyang itudlô.  Alang sa Presidente, sila kadtong may kasinatian na pagdumala sa ilang ahensya busa masayon na lang kanila ang pag-asumir sa posisyon.  Maanidot ang maong polisiya.  Sama sa Bise Presidente, kadto’ng mga sunod ang ranggo sa hepe ang pinakasayon og trabaho kay, sa matag adlaw, igo lang sila mangumusta kon buhi pa ba ang ilang hepe. Hala no!

Mapuslan pa’y kabaw

Pinasikad sa bag-o’ng Executive Order nga giluwatan ni Gobernador Gwen Garcia, multa ug pagkabilanggo ang nagpaabot niadtong mopakgang o maglangan sa nagpadayon nga rehabitasyon nga gibuhat sa mga utility companies sa mga lugar sa lalawigan nga naapektohan sa Bagyong Odette.  Dakong binuang ang pagpakgang sa gimbuhaton sa mga kawani sa utilitity companies.  Kon ugaling adunay mga tawo nga mobuhat niini, angayan silang taralon ug silotan.  Matud pa sa akong apohan, “Mas maayo pa kanila ang kabaw kay mapuslan pa sa darohan”.  Pagkatoytoy!

Duhay suwab nga awhag

Giawhag ni Presidente Duterte ang mga nurse nga sakop sa rebelding NPA nga motabang aron madugangan ang mga health workers alang sa pakigbatok sa pandemiya nga dala sa coronavirus.  Mipasalig ang Presidente nga bayran niya ang ilang kahagô ug mahimo ra usab sila mobalik sa ilang kampo aron makigbatok na usab sa gobyerno.  Duhay suwab ang maong awhag.  Kon dili mosanong ang NPA, bisan taliwala sa panginahanglan sa katawhan, molutaw nga dili sila maki-tawhanon sukwahi sa ila kunohay’ng kawsa.  Kon mosanong usab sila, sama ra nga nakig-alayon sila sa kagamhanan nga buot nila’ng lumpagon.  May’pag moligeed!