EDITORYAL - Kaandam sa kabomberohan

Miulbo ang dakong sunog diha sa Sitio Lawis, Brgy. Mambaling sa Dakbayan sa Sugbu niadtong dayong kilom-kilom sa langit adlaw nga Biyernes diin gatosan ka pamilya ang nawad-an og panimalay.

Dali ra kaayo nikatap ang kalayo sa kabalayan sud lang sa pipila ka minutos. Nikatap kini human nga wala mapugngi ang pagkasunog sa unang balay.

Gialegar nga gituyo ang pagsunog sa balay nga karon padayon pang giimbestigar sa kabomberohan.

Dunay nigawas sa social media nga namasangil nga wala dayon makaresponde ang mga bombero kay walay tubig ilang firetrucks tungod kay gigamit sa water salute sa convoy sa lubong ni anhing mayor Edgardo Labella.

Miani kini og pagsaway gikan sa mga netizen. Apan daghan ang wala makauyon sa tonada sa post sa usa ka inilang tawo dinhi sa dakbayan sa Sugbu.

Tungod kay sayo-sayo pa nianang adlawa gi-deploy kadalanan ang mga bombero ug hayag pa sa dihang natapos ang kalihokan.

Duna pay panahon nga makakarga og tubig ang kabomberohan kun sila naghimo gyud sa ilang trabaho.

Hinuon, kapunitan gihapon kadto og pagtulon-an aron kun tinuod man dili na mausab sa sunod nga mga susamang hitabo.

Apan angayan gyud sigurong dunay himuong reblocking sa maong dapit aron mas sayon sa mga emergency vehicles nga makaresponde kay ang lugar sikit-sikit kaayo og kabalayan nga halos tanan ginama sa light materials.

Wala sab mosakay ang lakaw sa panahon nianang tungora kay kusog ang hangin kay padulong kabundakon ang kusog nga uwan.

Tungod sa kusog nga hangin, piot ang dalan, daghang mga tawo ug uban pang nakababag sa dalan, paspas kaayong nakatapon sa kabalayan ang kalayo hinungdan sa pagkaugdaw sa lugar.

Dili tiaw para sa mga nasunogan, samot na karong mga panahona nga nagtakilid pa ang kadaghanan tungod sa pandemiya.

Nagkinahanglan sila og tabang  aron mapagaan ang suliran nilang giatubang karon ug aron sab paspas silang makabangon sa katalagman.