Pormal na nga magsugod karong adlawa ang tingklase sa tanang ang-ang sa pangpubliko ug pangpribado nga tulonghaan sa tibuok nasud. Apan atong makita nga magmingaw na usab ang atong mga eskwelahan.
Nakadesisyon ang nasyonal nga kagamhanan nga ipaagi gihapon sa online ug mga modules ang pagtuon sa kabataan karon nga school year. Kini gumikan sa padayon nga paghasi sa pandemiya sa coronavirus disease.
Hapit na diay duha ka tuig nga miarangkada sa kalibotan ang COVID-19 nga nagsugod didto sa Wuhan, China kaniadtong 2019. Karon, padayon kining mikutkot sa sistema sa edukasyon dili lamang sa Pilipinas kondili sa tibuok kalibotan.
Apan samtang wala pay klarong panagang nga madiskobre batok sa maong makamatay nga balatian, padayon usab ang study from home sa atong mga estudiyante.
Kini ilabina nga mayoridad kanila wala pa mabakunahi. Hinuon mitugot na ang nasyonal nga kagamhanan sa lakang pagbakuna sa mga batan-on nga nagpangidarong 12 hangtod sa 17 anyos human usab sa pasalig sa mga eksperto nga safe kini alang sa kabataan.
Bitaw, aron pagkab-ot sa herd immunity sa nasud, angay lamang nga iapil ang kabataan sa vaccination program batok sa COVID-19. Dili ba nga dakong porsiyento sa atong populasyon ang naglangkob man sa mga batan-on?
Hinuon, sa laing bahin, adunay dakong epekto ang kasamtangang pagtuon sa atong mga estudiyante nga layo sa ilang mga classroom. Mao nang dili na ikatingala pa kon padayon nga motiurok ang kalidad sa ilang nakat-onan.
Apan bisan pa man niini, padayon gihapon ang pagtuon sa atong mga estudiyante bisan kon layo man sila sa mga classroom. Kay ang importante adunay makat-on ang kabataan taliwala sa unsa mang pandemiya.