Sayop nga pagtinihik
Human gibungulbungolan ang awhag sa mas lapad nga PCR testing sud sa 20 ka buwan (kay ang “test, test, test” giawhag man sa World Health Organization sa pagsugod sa pandemiya) ug human nagpagoryo-goryo sa kapakyas pagtuman sa gisaad nga 90 mil ka tests kada adlaw sukad niadtong Marso, ang pamunoan ni Presidente Duterte nikumpisal sa tinuod nga hinungdan sa katihik sa testing:
Mahal ang PCR tests ug way kuwarta ang gobyerno nga ikagasto sa dugang tests.
* * *
Ambot napugos ba lang tungod sa sibaw’ng mga awhag nga gisubli karong bag-o ni Bise Presidente Leni Robredo, o nalipat sa kadaghan na sa pamalibad, o na-anghelan kay gikusi sa konsiyensiya, si testing czar Vince Dizon wa hinuon modiretso og angkon.
Gihapinan ang kumpisal sa naandang lusot nga gitambagan sila sa Department of Health nga mga masakiton ug close contacts ray angayng i-test, pero wa kapugong si Dizon pagpaburot sa gasto sa PCR tests.
* * *
Iyang kuwentada: P2,000 ang kada test ug kon i-test ang 10% sa populasyon (o 10 milyones ka Pilipinhon), mogasto ang gobyerno og P20 bilyones kada adlaw. Angayng kurhian dayon ang iyang pataka:
• Way awhag nga i-test ang 10 milyones ka Pilipinhon kada adlaw, kon dili 120,000 tests aron matultolan ug mabadlong dayon ang tinakdanay;
• Di tag-P2,000 ang test, may pribadong mga ospital nga nagtanyag og mas barato; ug
• Dul-an katunga sa tests gibayran sa mga pasyente sa pribadong mga ospital (sa 3,772 PCR tests sa Central Visayas niadtong Miyerkules, 2,573 o 68% ray libre sa mga laboratoryo sa gobiyerno).
* * *
Hinaut matambagan ang Malakanyang nga ang gasto sa testing wa ra sa kumingking sa kadaot sa nasudnong ekonomiya kada sulbong sa mga kaso ug lockdown ang mga sentro sa negosyo ug populasyon. Tungod sa katihik sa tests, naalkanse ang ekonomiya sa Pilipinas ug P2 trilyones sa niaging tuig ug mahimong kalabwan pa karong tuiga, segun sa banabana sa Asian Development Bank (ADB).
Gawas pa, mas mapuslanon ang PCR tests kay sa overpriced nga face masks ug shields sa Pharmally Pharmaceuticals Philippines nga nangalata sa mga bodega sa gobyerno, infinity pool sa Philippine Ports Authority ug dolomite sa Manila Bay.
* * *
- Latest
