Taas ang sukaranan, ubos ang uholan

Kini ang komentaryo sa kadaghanan sa dihang dunay usa ka senador ang ni-require sa mga kwalipikasyon sa mga magtutudlo aron makabaton sila og item o dili ba kaha makatrabaho. Kanila nga molansar ang mahinungdanon lamang mao nga maantigong mobasa ug mosulat, botante ug labaw sa tanan sikat ug maantigong mo budots.

Moabot sa P295,000 ang ilang sweldo samtang ang mga magtutudlo kun mapanalanginan, P23, 000 ang buwan. Timailhan lamang kin inga anaa gyud ang power differential bisan asa. Asa hinuon tong hago maoy diyotay, abunda ang giisip nilang hayahay.

Hinuon wala kini magpasabot tungod kay high paying ang usa ka tawo dili siya angayan ug takus alang niini. Dunay mga tawo nga anaa sa maong kahimtang apan nakita man pud nato ang ilang kakugi ug paningkamot.

Sa laing bahin, dunay mga tawo nga anaa sa ubos nga gumikan sa kakuwang sa kasibot ug katarong diha sa pagtrabaho ang dili pud maayo nga hatagan og hustong suholan labina kun ang trabaho nila pinadagan. Duna ra bay uban pud nga tungod sa giingon nilang kakabus ang mahimo niini nga excuse to the point nga sa ubang tawo sila mang-abuso.

Lisud baya gyud ang dekalidad nga trabaho kay aron sa pagkuha sa ingon, mahinungdanon usab ang gitawag nilang incentives. Ang incentive nga makapadasig. Dugang pa ning panahona karon malisod ang dekalidad nga serbisyo kun ang moserbisyo ug ang giserbisyohan ang mo-evaluate sa matang sa serbisyo pinasikad lamang sa salapi. Mass production apan low quality walay ayo.

Ang uban kunohay aron paghatag og igong paukyab ang mohimo kunohay og saad aron pag maintain sa ilang gahum ug bentaha sa mga tawo nga padayon nilang gitonto ug giulipon. Apan sa kaulahian usa ka dakong prank lamang ang tanan. Ingon ana ang kinabuhi, ingon ana ang kalibutan.

Apan bisan pa man kun salbahis ang dagan sa kalibotan ug ni bisan kinsang kalibotanon, maningkamot gihapon kita sa paghatag sa bisan unsang maayo nga makapalipay sa kadaghanan. Kay ning paagiha lamang mapamatud-an nato nga mas nindot ang mobuhat og dekalidad nga serbisyo kay sa lamolamo nga lihok uban ang panghukhok.