Miabot na’ng gikahadlokan

Ubay-ubay nang nangamatay sa mga pasyenteng nag-antos paglinya gawas sa ospital sanglit wala nay bakanteng lawak nga kapahimutangan sa sulod. Puno na. Unya gikulang pa g’yud sa mga doktor ug mga nars nga makaatiman gilayon sa emerhensiyang panginahanglan.

Sa gawas, naglaray ang mga ambulansiya ug pribadong sakyanan nga gikutayan og hose sa oxygen aron ang nagpaabot nga pasyenteng sakay, kinsa naglisod na sa pagginhawa, matabangan samtang naghulat kanus-a tawagon ang ilang ngalan.

Sa naghinapos nga bulan sa Hulyo, nagsunod la’g pagpamiya sa dayon akong mga suod higala, klasmet ug kanhi kauban sa trabaho.

Pulos sila malamposong amahan. Usa’g usa, adunay anak nga doktor ug nars.

Ug parehong himsog pa ang pamarog bisag puti na ang mga buhok. Hinungdan, nga dihang nakita ko ang mga masulob-ong kandila sa Facebook nga nagsiga, diin daghan sa kaparyentihan ug kahigalaan ang mipadangat og pahasubo sa nagbangutang pamilya, naglisod ko pagtuo sa hinanali nilang pagtaliwan.

Busa, gisusi ko ang hinungdan sa ilang kamatayon. Matag tagtungod, parehag tubag: COVID kuno! Unya gipaloapan ko sila’g pangutana kon fully vaccinated ba ang nangamatay sa pang-alkontra sa COVID-19? Diin, sila mitug-an: “Yes, fully vaccinated.”

Nakurat ko sa akong nasayran. Tiaw bay, sila may doktor na’ng anak, unya fully vaccinated pa! Ug nganong nangaigo-patay gihapon?

Ingon na ba ka deadly ang third wave nga matang sa COVID-19 nga atong giatubang karon? Ang pait, kay dili pa gayud ta kaduol, kahatod ug kahatag sa atong kataposang gakos. Mao na ba kini ang pag-abot sa mga adlaw nga gikahadlokan?

Hinuon, kon kita mamatay kay makanunayon natong gituman ang health protocols dinhi sa yuta ug sa langit, dili na ta makamahay sa atong kaugalingon. Pero kon kita pirmeng magmasinupakon, diin daghang kinabuhi ang naangin-naalaot, pagkadako kaha sa atong tulobagon sa higayon nga Iya na tang tawagon?

Ayaw itugot nga moabot pa ang mas gikahadlokang bunga sa atong pagkagahi’g ulo. Kon karon, may nag-ung-ong balaod nga dili makasulod sa mga malls, pampubliko/pribadong merkado, apil na department stores, super markets ug convenience stores, ang mga tawong wala pa ma-fully vaccinated, basin mopanday na gyo’g kamandoan ang atong kagamhanan, nga patyon ang dili magpabakuna.

Please, be a good law-abiding citizen.