Sa Pagbangon sa Sayong Kabuntagon

Kining magkatigulang na ta, nahimong magkadiyotay ang panahon sa atong paghikatulog. Dili lang tuyoon nga matag alas tres ako mahigmata. Nisantop dayon sa akong hunahuna ang ka limitado sa kinabuhi ning kalibotan. Basin moabot ang panahon nga ako nga bisan pa man ning akong panuigon ang mamahimong mopanaw ug motaliwan.

Nigawas ko sa akong lawak. Sa ludhanan gipiko ko ang akong mga tuhod atubangan niadtong krusipiho diin kadtong nagbitay padayong nihatag kanako og ayuda ingon man kusog labina sa mga higayon nga buot ko na lamang pasagdan ang kasingkasing nga mopitik hangtud siya mohunong.

Gipasagdan ko ang mga takna nga molabay lamang diha sa kahilom sa pamasin nga ang maong kahilom mohupay sa nahabiling tibi sa tawhanong pagmahay. Mituktogaok ang manok nga hinatag sa halayong bukid sa Cancalape. Kuyog niini ang pagbagting sa lingganay timailhan sa maampoong pagbalaan sa takna nianang adlawa.

Nahigmata ako sa kamatuoran nga kinahanglan kong makigbisog ning panahona alang sa akong kaugalingon. Daw napupos ang tanang kusog sa paghunahuna sa panginahanglan sa uban. Salamat sa kahilom nga maoy nibulig kanako aron mas mapaladman ang tanan.

Usa sa gitudlo ni San Ignacio sa iyang Santos Ehersisyos mao man ang Conscious Examen. Sa akong nasabtan ug sa akong nakat-onan nga gihimong sayon ni Kuya Dindo Paradela mao man nga inig mata nimo sayo sa buntag imong hunahunaon ang mga butang nga imong pagahimoon anang adlawa. Gahinan nimo kini bisan mga pulo ka minutos. Inig kagabii imong gahinan og laing mga gutlo aron pagahimoon ang pag evaluate. Ug labaw sa tanan ang pagpangita sa presensiya sa Dios ning maong mga kasinatian.

Kini ang kuwang sa kadaghanan kanato karong mga panahona. Daghanan ang nahimong mga dunay kahibalo apan dili makinaadmanon. Hinuon nindot ang sayong kabuntagon.