Anak nga walay kaluoy sa ginikanan

May agalong naluoy’ng nagtan-aw sa usa ka inahan kon giunsa pag-abuso sa bugtong niining anak lalaki. Pagpangagawon man lang ugod isip yaya ang gisudlan sa  inahan, samtang ang mister usa ka security guard sa convenient store, isip usa ka reliever.

Pero ilang anak? Buhay mayaman! Dili mokao’g inun-unang bahaw. Gusto gyog karne nga maayong pagkaluto.

Bisan sa mga delata nga pagkaon, mamili. Baratohong corn beef? No, way! Yam-iran ra kini. Kay paborito gyod niya kadtong mahalon.

Naatol nga ang gialagarang pamilya sa inahan may daghang suod higalang tag-iyag mga auto repair shop. Usa ka kuhit lang sa agalon ngadto sa iyang mga amigo, mahimong makasulod dayog trabaho ang nahisgotang anak.

Ug sanglit automotive graduate man ang anak, gidasig sa agalon nga pasudlon.

Apan ‘Big No!’ ang gitubag, uy! Layo ra kuno ang nahimutangan. Unya bug-at pa ang trabaho.

Sa nag-eskuyla pa ang anak, P100 gyod ang ipabawon niini sa inahan kada adlaw.

Ug bisag karon nga wala na magtungha, magsige gihapog pangayog P50 halos tanang adlaw.

Ang pait, kay kining kuwartang gipangayo, ipalit rag sigarilyo ug para pang-load sa iyang selpon. Diay, tibuok gabii kining motan-awg mga lainlaing kalingawan sa internet. Unya sa adlawan matulog. Ug sa pagkaon, inandaman gihapon sa inahan.

Hinungdan, nga labihang himsoga kining maong anak. Walay bun-og. Kay ang trabaho sige rag kaon, pangayog kuwarta sa Mama ug patsoytsoy bisag walay sulod ang bulsa.

Ang agalon naluoy sa kahimtang sa inahan ug gitambagan nga dili na pahatago’g kuwarta sa anak aron mapugos kini pagpangitag kapanginabuhian. Pero, blood is thicker than water.

Mopasulabi gyod ang gugma sa inahan bisag unsa katapolan ang anak. Bisag abusohan pa sa anak ang sobrang kaayo sa inahan.

Hinuon, matud pa sa iladong Fr. Ciano Ubod sa usa sa iyang mga homiliya, nga kinsa kadtong inahan nga padayong mahigugma, andam mosakripisyo ug moantos sa badlongong anak, may dakong luna sa langit.

Kay wala moanhi si Hesus sa kalibotan alang sa mga maayo. Kondili, aron pag-ayo sa mga masakiton.

Apan alang nako, mas nindot, kon ang mga hiwing kinaiya tul-iron.

Kay sa paundayonan kini hangtod nga mosamot na hinuon kahiwi ug dili na matul-id.