Giuhaw Ako (Juan 19;8)
Matud pa sa Ethics dunay gitawag og Human Act ug Act of Man. Ang Human Act mao kadtong bulohaton nga naglambigit og knowledge, free will ug freedom whereas ang Act of Man usa man ka buhat pinasikad sa instinct.
Sama pananglit sa lawasnong panginahanglan sa bisan unsang ilimnon nga sa lawas makatagbaw labina gyud kun maghisgot kita og tubig. Busa makaingon kita og GIUHAW AKO! GIHUAW KITA matag karon ug unya sanglit buot man kita matagbaw.
Apan kun ugaling kita matagbaw may limitasyon ra gyud kini. Kay human kita makainom sa ilimnong gikahinaman nato, mamahimong uhawon kita pagbalik dili ba?
Sayud ang Dios sa atong kahimtang ug kay sayud man siya sa atong kahimtang, iyang gihatag kanato ang daghang mga kahigayonan aron matagbaw nato ang atong mga kauhaw una sa atong mga panginahanglang lawasnon ug dili ang kapritsong lawasnon.
Ikahuha, ang kauhaw sa mapinanggaong gakus ug hawok sa Diosnong gugma nga gihimong buhi diha sa atong kalambigitang tawhanon. Ug labaw sa tanan ang pagsulod sa presensiya sa Dios mao man ang tinud-anay nga pamaagi sa pagtambal sa atong kauhaw sa mga butang Diosnon nga naghatag kanato og kahigayonan nga matagbaw sa tinud-anay. Katagbawan nga dili mahimong mahatag sa kalibutan ngari kanato. Busa makaingon ko God will provide, Deus Providet.
Kini maoy isilsil sa atong alimpatakan, mao nga dili angay nga malisang o mahadlok kay anaa ang Ginoo sa imong luyo padayong mohatag ug moabag kanimo. Kini ang hinungdan kun nganong kinahanglang diha sa panaw we have to travel light ingon tang pulonga. Unsay buot ipasabot niini?
1. Una, be practical. Tinuod dunay sentimental value ang matag hugna ug matag yugto sa atong kinbuhi. Apan dunay uban kanila nga kinahanglan atong biyaan ug talikdan aron maka move forward sa umaabot.
2. Ikaduha, be sincere labina gyud sa imong kaugalingong baruganan. Ayaw tugoti ang ubang tawo nga mopugos nimo paglakaw sa dalan nga dili alang nimo. Subaya ang dalan alang nimo dili kay subayon mo ang dalan nga gilatid nila alang nimo.
3. Ikatulo, be generous sanglit ang kinabuhi hamubo ra man gyud mao nga paningkamoti nga ultimate ang pagpuyo mo niini. Buhat lang gihapon og maayo bisan pa man kun dili ka na maayo sa panlantaw sa uban.
4. Ikaupat, dili tanang komentaryo kinahanglan nga imong paminawon labina kun mohimo ka og mga lakang alang sa kalambuan. Ang mabungahong manga ang pagabatoon.
5. Ikalima, hinumdomi nga ang Dios lamang ang imong gipahimuot ug dili ang tawo. Angay lamang nga sa Dios ka manubag ug dili sa tawo.
6. Ikaunom ang tanan lumalabay lamang mao nga ayaw paghinakog. Diha lamang sa pagpaambit ikaw mamahimong mabuhi sa paagi nga madagayaon.