Unang pulong

Amahan, pasayloa sila kay wala sila masayud sa ilang gibuhat (Cf. Lk. 23;34

Kay unsa ba gud ang Sala? Ang sala kun sa Griyego pa amartia  kun missing the mark nga sa ato pa sipyat, ang pagpakasala usab nga nahimo sa matag usa kanato mao man ang pagkahitumpawak sa dalan nga simang. Nasimang kita sa makadaghan. Nahisalaag kita sa makadaghan. Nasimang kita tungod kay wala man nato tarunga og gamit ang atong kagawasan. Ang sala gitawag kini siya og Human Act tungod ning mosunod nga mga element:

1. Una, anaa ang Free will kun ang kabubut-on.

2. Ikaduha, ang kagawasan kun freedom sa pagbuhat ug sa dili pagbuhat niini.

3. Ikatulo, anaa ang kahibalo kun knowledge nga sa ato pa ang nagbuhat sa ingon nahimong aware sa gibug-aton sa iyang pagahimoon apan sa kaulahian iya gihapong gihimo.

Kun atong sumadahon, ang pagpakasala, nagpasabot nga tinuyoan. Desisyon na gyud kini sa hingtungdan. Desisyon niya labina kun nahimo siyang comfortable na gyud niini.

Amahan ko! Sangpit sa pangilaba sa atong Ginoo ngadto sa iyang Amahang Langitnon, pagpadayag sa iyang dakong gugma niini. Ang Dios alang kaniya dili halayo! Ang Dios alang kaniya. Kadtong  panahona nga siya nagbitay sa krus niadtong balabag sa kasakitan, wala mawagtang ang gugma sa iyang kasingkasing. Bisan pa man sa mga panghitabo nga pait pa sa panyawan padayon gihapong gipahari niya ang paghigugma. Oo gugma! Nga andam modawat sa kalisud ug pag-antas! Ang pulong ABBA tawag sa paghigugma! Ang pulong ABBA timaan nga suod kaayo si Jesus ug ang iyang Amahan! Pulong nga nagdapit kanato nga mamahimong suod usab kaniya. Suod kita dili tungod kay dunay nagpaabot nga ganti. Makigsuod kita tungod kay kita nahigugma.

Pasayloa sila! Hangyo sa pangilaba nga unta bisan pa man kun sayud ang atong Ginoo sa gibug-aton sa kalapasan sa matag usa kanato padayon gihapon siyang nagpadayag sa iyang dakong gugma nga tungod niini deserving gihapon kita sa second chance or chances ba kaha. Ingon ana kita kabug-at ngadto sa Dios. Ingon ana kit aka bililhon ngadto niya. Sa susamang paagi aron mamahimong hingpit ang atong pagpasaylo kita pud mopasaylo dili tungod lamang sa nakasala kanato kondili tungod sa atong kaugalingon. Ang pagpasaylo tambal. Magdala kini og kalinaw sa atong paghikatulog. Kalinaw sa tawhanong kalambigitan.

Kay wala sila masayud! Dili tungod kay kadtong mga tawhana nga nilansang kanila ug kita karon mga tawong walay kahibalo ug kaantigohan, kondili mga tawo kita nga wala masayod sa bili sa Dios sa atong kinabuhi busa siya atong gisalikway. Ang atong pagsalikway niya maoy sinugdanan sa atong pagkadagma. Nagtuo kita nga mahimo nato ang tanan sanglit may kaugalingon man kitang katakos! Apan kawang lamang ang tanan kun wala ang Dios!

Nagdumili kita sa pagsud-ong sa matuod tungod kay mas bililhon ang bakak ug ang pagpaaron.

Sa ilang gibuhat! usahay mahinungdanon alang nato ang klase sa mga sala… venial, mortal sin of commission kun ang pagbuhat sa dili angay buhaton,ang sin of omission ang wala pagbuhat unta sa kinahanglang buhaton. Apan kun atong langkobon ang root word sa gihapon mao ang SIN kun sala ug ang middle letter sa word nga SIN mao ang I kun Ako! Makasala kita tungod kay si Ako lamang ang anaa sa atong hunahuna ug pagbati. Nahikalimot kita nga dunay ikaw o sila nga mahimong maapektuhan niini. Ug nahikalimot kita nga dunay Ginoo nga masakitan niini. Ang bisan unsang salang personal mamahimong sinugdanan sa mga sistemang masalaypon. Ug kun buot kita og kausaban sa atong nasud mahinungdanon kaayo ang pag-usab sa atong kaugalingon. 500 years na tuod kita sa pagka Kristiyano ning atong kapupod-an apan padayong usa ka dakong hagit alang kanato ang paglumpag sa barikada sa salang tinuyoan nato. Salamat Ginoo kay bisan kun nahisalaag ako ug daw nahugaw ikaw nagpakahugaw usab aron ako imong gakson…. Salamat kaayo niana Lord! Salamat kaayo nga bisan ako samaran nga pagkatawo, gihimo mo akong wounded healer alang kanila nga sama kanako mga samara usab.

Pag-ampo

O Amahan sa kalangitan, nga tungod sa gugma mo alang sa mga tawo walay ukon ukon nihatag dayog pasaylo sa mga tawo. pasayloa kami sa among pagpatuyang, pagpapakasala kanimo, ug dinhi sa atubangan sa nagtinga mong Anak, among isaad ang paghikalimot sa mga kasaypanan nga nahimo batok  kanimo  karon magpasaylo sa usag usa. Batonan na namo ang kaaghup alang sa tanan agig pagsanong sa pagtulon-an ni Jesus nga nahambin sa iyang unang katapusang pulong… Amahan ko Pasayloa sila kay wala sila masayud sa ilang gibuhat! Amen.