Nahimong dakong isyu ang pamahayag ni Presidente Duterte nga dili kuno angay nga ang nasud maoy manubag sa obligasyon kon may dili maayong epekto sa pagpabakuna sa anti-COVID-19 vaccine.
Para kanako, dili makatalikod ang kagamhanan sa iyang katungdanan sa katawhan, ilabi na kadtong ila nga gipabakunahan og Sinovac wa pa gani gyud mamatud-i nga makapanalipod sa lawas sa tawo.
Kon giaprobahan man gani sa Food and Drugs Administration sa Pilipinas ang mga vaccine aron nga gamiton kini sa tawo, angay gyud nga manubag ang kadagkoan sa nasud.
Apan kadtong mga tawo nga hilom nga mamalit og vaccine gikan sa mga abtik kaayo nga nakapayuhot sa maong bakuna, aw ila na kana nga risgo kon may daotang epekto sa ilang bakuna nga gigamit.
Sa ubang nasud, bayaran sa ilang kagamhanan kadtong mga kabanay sa mga tawo nga mamatay o kaha makasinati og kadaut sa ilang lawas human sila misugot nga himoan og clinical trial.
Kining mga bakuna nga gigamit nato karon nahisama pa kini sa clinical trial kay wa pa gyud kini mapamatud-i nga makapugong nga mataptan kita sa coronavirus human nga ang tawo mabakunahan.
Aw, sumala gud, dunay duha ka overseas Filipino worker (OFW) nga miuli dinhi sa Sugbo human sila bakunahi didto sa nasud nga ilang gigikanan, apan sila natakdan ra gihapon dinhi.
Sa ato pa, ang mga anti-COVID-19 vaccine nga gipanggamit, dili gayud makasanta nga dili na matakdan ang tawo, unya ang Sinovac nga hinimo sa mga Insik pwerte ra ba nga mahala.
* * *
Nagtuo ko nga modangop gyud ang mga vendors sa Carbon Market didto sa hukmanan aron mapugngan nila ang pagmugna og modernized public market nga tukoron sa Megawide Construction. Si Erwin Gok-ong, chairman sa Cebu Market Vendors Cooperative (CEMVEDCO), miingon nga ang ilang pagsupak nga ang Megawide maoy motukod sa modernize public market kay mosaka gyud ang abangan sa mga stalls sa merkado.
Gusto sa mga vendors nga ang Cebu City government ra gyud ang mopatukod og bag-ong merkado kay pinaagi niini, masiguro nga dili kini mopamahal pag-ayo sa abangan nilang mga manindahay sa Carbon.
Kon madayon kining proyekto sa Megawide, ang maong private company mao na ang mangolekta og abangan gikan sa mga vendors.
Matud ni Gok-ong nga tinuod, ang bisan unsa nga pagpausbaw sa bayranan sa mga stalls kinahanglang aprobahan usa sa City Council, apan dunay lagda sa Joint Venture Project nga ang Konseho mosunod gyud sa sugyot gikan sa Oversight Committee.
Ang Oversight Committee sa JVA gilangkoban og pito ka sakop, tulo gikan sa City Hall ug ang upat gikan sa Megawide.