EDITORYAL - Bawal ang PDA

Kinsa man gyud diay maoy maghimo og mga guidelines mahitungod sa pangutana sa panglawas? Mga polis ba o ang mga doktor?

Karong bag-o, gisaway ang tigpamaba sa Philippine National Police nga si Brig. Gen. Ildebrandi Usana sa pamahayag niini nga “automatic violations” sa health protocols ang public display of affection (PDA).

Ang PDA mao kini paghawok, pagkuptanay og mga kamot ug paggakos sa tawo diha sa pangpublikong lugar.

Sa ato pa, kung ang managtiayon o managsuon maghimo niini diha sa publikong dapit pananglitan kun padung na motrabaho o molarga ang pares, otomatiko kining isipong paglapas sa health protocols?

Wala man kini kalainan sa gisaway sab nga mga guidelines kaniadto sa pagsugod palang sa pandemiya sa coronavirus bahin sa pag-angkasay sa motorsiklo nga diin gidili sab sa miaging tuig.

Apan kadugayan, gipaluagan tungod kay naputos sa pagsaway ang maong kamandoan tungod kay lagpas kaayo sa kamatuoran.

Gidid-an bisan ang magtiayon nga mag-angkasay sa motorsiklo o sa laktod bawal gyud ang mag-angkasay sa motor kini bisan adtong panahona naglisod ang tanan sa transportasyon.

Kataw-anan tungod kay ang magtiayon magdulog pa og katulog kay nagpuyo ra sa usa ka balay. Mao sab kini sa kaso sa mga managkabanay nga nagpuyo ra sa usa ka panimalay.

May punto si Usana sa iyang pamahayag kung bahin sa pagtinakdanay sa virus maoy iyang gipasabot apan makapangutana ang publiko kun doktor o eksperto ba siya aron maoy mamahayag bahin niini?

Usa pa kaning PDA pagpadayag man kini og pagbati ug pagmahal sa pamilya, karong panahon sa pandemiya mahinungdanon kaayo ang pagpalig-on sa bugkos sa matag banay.

Bawal na diay karon ipakita ang gugma sa usa’g-usa kung mao na.

Kaning bahin unta sa panglawas nga mga guidelines, mas maayong ang mga eksperto sa epidemiya o mga doktor maoy moluwat og mga pamahayag aron dili sawayon sa publiko.