Gi-presume nga sad-an

Giaprobahan sa Ubos Balay Balauranan ang House Bill No. 7814 nga naghatag og dugang ngipon sa Akta Republika Numero 9165 o Comprehensive Dangerous Drugs Act of 2002.

Sa boto nga 188 pabor, 11 wala mopabor ug siyam nga walay hukom, giaprobahan sa Ubos Balay Balauranan ang balaudnon nga gipangamahanan ni Surigao Del Norte Kongresman Robert Ace Barbers nga nag-presumed nga sad-an na sa mga importer, financier ug protector sa ginadili nga drugas hangtod nga iyang mapamatud-an sa hukmanan nga dili siya sadan. Ambot mouyon ba niini ang Senado.

Ang 1987 nga Batakang Balaud sa Pilipinas nag ingon nga ang akusado ipresume nga inosente hangtod nga siya mapamatudan sa hukmanan nga sadan sa walay lama sa pagduda. Kini agi og pagpanalipod sa mga gipasanginlan tungod kay dili tanan nga pasangil tinuod.

Sigun sa taas nga linya sa mga nahimo nang hukom sa pinakataas nga hukmanan sa Pilipinas nga mao ang Korte Suprema iyang giingon nga ang Batakang Balaud mao ang tinubdan sa tanang mga balaud busa walay balaud nga ipalabang ang kongreso nga supak sa Batakang Balaud.

Dinhi maingon nato nga magsugat, magbagat ug magsumbagay ang gitawag nga presumption of innocence ug presumption of guilt.

Sa presumption of innocence ang akusado gi-presumed nga inosente hangtod nga mapamatudan nga sadan sa walay lama sa pagduda sa reklamo samtang sa presumption of guilt ang akusado gi-presumed na nga sad-an hangtod nga iyang mapamatudan nga wala siyay sala sa walay lama sa pagduda.

Daghan nga sakop sa Ubos Balay Balauranan mga abogado ug posible nga ang mga dili abogado mikonsulta og abogado sa wala pa sila mobotar pabor sa balaudnon. Basin sa ilang pagtuon sakto sila sa ilang pagtuo nga legal ang balaudnon nga ilang gipalabang ug giaprobahan.

Pero ambot mopabor ba ang mga senador sa ilang gipalabang nga balaudnon ug kun mopabor man, mopabor ba pod kaha ang hukmanan. Ato lang paaboton.