EDITORYAL - Bisag asa pa dapig, Pilipinas pagan gihapon

Sa kataposan nakita nga dili gyud mahitabo nga mawagtang ang alyansang militar sa Pilipinas ug sa Amerika bisan pa man og ang presidente karon nga si Duterte dayag kaayo sa iyang kayugot ngadto sa mga Amerikano.

Sa miaging buwan, si Duterte miangkon nga importante kaayo ang alyansa sa duha ka mga nasud nga nahimugso sugod pa niadtong 1955 o ang Mutual Defense Treaty nga gisundan aning 1999 Visiting Forces Agreement, Enhanced Defense Cooperation Agreement (EDCA) ug tanang bilateral military agreement sa duha.

Gawas sa dayag kaayong pagsige og saway ni Duterte sa Amerika sugod palang paglingkod niya sa Malacañang kabahin sa pagpanghilabot niini sa internal policies gamit ang isyu sa human  rights violations partikular sa war on drugs, nakigsuod sab siya sa China.

Aron tingali pabilibon ang China gipahibalo ni Duterte sa miaging tuig nga putlon na ang VFA sa Pilipinas ug US.

Gihimo kini ni Duterte bisan sayod kini sa agresibong gipanghimo sa China sa West Philippine Sea.

Pirmeng gipahid ni Duterte ang tanang nahitabo sa WPS  ngadto sa nanglabay nga mga administrasyon bisan og sa iya untang panahon dako siya og mahimo aron pakgangon ang China ilabi na kun iyang ipatigbabaw ang Arbitral Tribunal desisyon nga mipabor sa Pilipinas.

Tungod pakigsuod niya sa China nakahigayon silang paspasan ang paghuman sa gipangtukod nga mga artipisyal nga isla diha sa WPS.

Maayo nalang sab nga midaghan ug nagpatong-patong ang ilang dili maayong gipangbuhat sa China. Nakamata si Duterte.

Naglakip kini sa pag-abog sa mga nagpatrolyang barko ug abyon sa Armed Forces of the Philippines diha sa WPS;  paglusot-lusot sa ilang mga barkong panggubat sa sud mismo sa Pilipinas nga walay pananghid ug daghan pang uban nga nakapausab sa desisyon ni Duterte.

Pagkatinuod, bisan asa pa siya dapig o magpaka-neutral pa, mapagan gyud pirme ang Pilipinas kun magkagubot ang duha ka higanteng mga nasud.

Tungod kay ang nahimutangan sa Pilipinas parehong magamit sa duha alang sa ilang estratehiya aron buntogon ang usa’g-usa.

Nakita tingali sab ni Duterte nga dili niya mahimong ipatulon ang ideya nga ang China gyud maoy kaabin sa Pilipinas.