Halandong kabilin

Dili malalis nga dakong bahin ang nawala sa Sugbo niining pagtaliwan ngadto sa laing kalibotan ni Jose “Sir Dodong” Gullas, ang chairman sa The Freeman ug Banat News, ug kanhi executive vice president sa University of the Visayas.

Dakong instrumento si Sir Dodong sa dakong kampanya pagsabwag og maayong edukasyon ngadto sa kabataan dili lamang gikan dinhi sa Sugbo kondili niadto’ng gikan usab sa kasikbit nga probinsiya ug sa Mindanao.

Sa natad sa inpormasyon, mas inila si Sir Dodong isip tsirman sa The Freeman ug Banat news. Gani usa ka importante nga bahin sa kasaysayan sa diyornalismo sa Sugbo ang iyang pagbanhaw sa The Freeman subra sa 50 ka tuig na ang nakalabay.

Sulod sa among editorial office, kanunay gayud maglanuglanog ang tambag ni Sir Dodong kanamong mga editor sa kanunay pagbaton og propesyonalismo alang sa patas nga pagsabwag og inpormasyon ngadto sa publiko.

Matag meeting namo sulod sa iyang opisina, kanunay nga ipahimangno ni Sir Dodong kanamo ang ka importante sa pagprotiher sa ngalan ug reputasyon sa The Freeman ug Banat News isip usa ka halandon nga institusyon sa pamahayag dinhi sa Sugbo ug Kabisayaan.

Hinuon, nasayod mi nga dakong malipayon si Sir Dodong tungod kay wala mapakyas ang iyang pangandoy alang sa The Freeman ug Banat News nga mahimong usa ka malampuson nga media organization taliwala sa daghang pagsulay.

Mipanaw na si Sir Dodong sa edad nga 87 anyos. Apan niining iyang pagtaliwan, lisod gayud malimtan ang iyang mga nabuhat, nga nahimong inspirasyon ug mahinungdanong legasiya sa mga Sugboanon.