Happy trip, Sir Dodong

Samtang buhi pa ang tawo, kinahanglang mangandam ug andam kanunay sa dili pa moabot ang iyang kinutoban. Mao kini ang pirmeng ipahimangno ni Hesus sa Iyang mga tinun-an.

“Busa, pagtukaw, kay wala hibaloi unsang adlawa moabot ang Ginoo. Hunahunaa ni. Kon ang tag-iya sa balay nasayod nga ang kawatan moabot sa kagabhion sa takna nga gitagal, magtukaw siya aron dili makasulod ang kawatan. Hinunoa, pagbantay, kay ang Anak sa Tawo moabot sa takna nga wala ninyo mahibaloi.” (Mateo 24:42-44)

Si Jose “Sir Dodong” Gullas taudtaod nang adunay gihambing balatian. Apan wala kini makapugong sa iyang pagpangalagad sa katawhan nga napanunod sa mitaliwan na nilang ginikanan, kinsa maoy migiya kanilang tanang anak pagpadayon sa maayo nilang binuhatan.

Daghang kasingkasing ang gipangtandog sa kamanggiluy-on ni Sir Dodong. Kadtong mga mass wedding kanhi, diin siyay miabaga sa tanang galastohan atol sa pagsaulog sa iyang birthday, pagkadaghang naglib-inlib-in nga nakalingkawas sa salang pre-marital sex nga hagbay ra nilang gilunangan.

Hinuon, gihunong kini ni Sir Dodong dihang ubay-ubay nang politiko ang nakat-on-takdan pagpahigayog mass wedding. Apan gipulihan niya kinig gift giving ug medical mission alang sa mga nanginahanglan.

Usab, pioneer siya pagpasiugda ning mosunod: Night classes para makaeskuyla ang nanagtrabaho sa adlawan. Study now-pay later education plan sa UV nga ilang gipanag-iya. Ug sa pagpadali sa suweldo sa mga maestra nga kaniadto dugay kaayong madawat, dihang napili siyang Kongresista sa unang distrito sa Sugbo.

Aktibo si Sir Dodong sa kalihokan sa archdiocese. Migahig oras ug salapi pagtabang-himog kapilya ni anhing Msgr. Teofilo Camomot didto sa Daughters of St. Teresa’s compound, Valladolid, Carcar City. Diin, sa nahabiling daginotong yugto, mihangyo nga adto magpalubong haduol sa gilubngan sa Santosonong pari.

Tataw kaayo, nga sa layo pa, gibuhat ni Sir Dodong tanang pagpangandam nga makapahimuot sa Ginoo. Kay bisag wala pa siya moestar didto sa departure area, iya mang giseguro nga ang sulod sa bagahe nga iyang dad-on paingon sa langit pulos mga maayong buhat nga makalipay sa iyang isig ka tawo.

Busa, gikan sa The Freeman Banat News family, kinsa nakaila-sinati sa imong pagkamapaubsanon ug pagkasulondong mangangalagad, dinuyogan sa among pagwarawara, kami moingon kanimo: “Happy trip to Heaven, Sir Dodong!