PEBRERO 21, 2021: Unang Domingo sa Kuwaresma
Mga Pagbasa: Gn. 9;8-15/Sal. 25/1
Ped. 3;18-22/Mk. 1;12-15
Tabunok sa kahulogan ang numerong 40 diha sa Balaang kasulatan. Kini tungod kay nipahinumdom kini ning mosunod:
1. Kap-atan ka mga tuig sa pagbaktas sa mga Israelita padulong sa yutang gisaad diin sa maong pagbaktas nahanaw ang masupilong kaliwatan ug ang bag-ong mga kaliwatan lamang ang nakasulod niini. Bisan gani si Moises wala man makasulod didto.
2. Kap-atan ka adlaw ug gabii diin gipaulanan sa Dios ang tibuok yuta nga maoy hinungdan sa dakong lunop sa kapanahonan ni Noe.
3. Kap-atan ka mga adlaw ug gabii diin si Jesus nagpuasa ug nag-ampo ug gitintal sa tanang paagi sa wala pa niya pormal nga sugdi ang iyang public ministry.
4. Kap-atan usab ka mga adlaw kitang nagbansay sa mga bulohaton sa kwaresma samtang dili pa kita magsaulog diha sa mahigugmaong paghandom sa pagpasakit ug kamatayon sa atong Ginoo. Mao nga ginganlan kining panahona og kwaresma gikan sa pulong Quadregissima nga nagpasabot og kwarenta kun kap-atan.
Ang unang Dominggo nakasentro gyud dayon sa paagi nga gisuwayan kun gitental ang atong Ginoo sa yawa. Gipakita usab kun giunsa niya pagpadayag ang iyang kamatinud-anon ngadto sa Dios. Ning maong kasinatian sa atong Ginoo gipahinumdoman kita nga ang bugtong paagi aron mamahimo kitang luwas mao ang pagpabilin sa atong focus ug sa atong mission.
Kay ang pulong sala gikan man sa pulong griyego nga amartia nga nagpasabot og missing the mark, ang kap-atang numero ingon nga simbolo nagkahulogan man og purification. Ang purification nga mahinungdanon kaayo sa atong kaugalingong paglambo.