EDITORYAL - MVIS dugang kalbaryo

Daw naibtan og tunok ang mga nanag-iya og sakyanan ug motorsiklo nga gikatakdang mag-renew sa rehistro o magpa-rehistro sa ilang bag-ong sakyanan karong gipahunong ni Pres. Duterte sa Land Transportation Office kining mandatory motor vehicle inspection system (MVIS).

Ang inspeksyon gihimong rekisitos sa pagparehistro o pag-renew sa rehistro sa mga sakyanan ug motorsiklo diha sa LTO. Apan si Presidential Spokesman Harry Roque Jr. mianunsyo kagahapon nga dili na mandatory karon ang MVIS. Nagkahulogan kini nga makamenus na og gastos ang mga drayber o nanagiya og sakyanan sa pagparehistro o pagpa-renew sa rehistro.

Daghan kaayo nangreklamong drayber ug tagiya’g mga sakyanan sa kadako sa ilang nabayran aning mga pribadong MVIS.

Kaniadto, kinahanglan lang motuman sa Clean Air Act pinaagi sa smoke emission test sa mga private emission testing centers (PETCs) ang mga sakyanan unya marehistro na. Apan tungod aning mga pribadong Motor Vehicle Inspection Centers nga nagpatuman  aning MVIS , moagi og 73 ka inspections points ang mga sakyanan o motor, kun dunay usa nga di kapasar, hagbong unya bayad sa multa.

Sakit sa bulsa mao nga daghang motoristang nag-renew og rehistro ang nangreklamo tungod kay makadaghan sila gipabalik-balik tungod sa nagkalain-laing matud pa violations sa ilang unit.

Matag violation dunay multa, bisan gani og hugaw lang ang motor o sakyanan may multa na sa MVIS, ug kinahanglan ipaayo laing gasto na sab sa tagiya ug ini’g ibalik sa MVIS laing proseso nasab ug kun makapasar ayha pa tawon makalahos sa LTO aron magparehistro diin duna say laing bayranan.

Tiaw mo na, kada lihok bayad? Pug-on gyud ang mga nanagiya og sakyanan aning kalakiha? Dugang kini sa kalbaryo sa mga motorista karon ilabi na nga duna pay pandemiya. Tinuod kinahanglan gyud nga estriktuhon ang inspeksyon aning mga sakyanan tungod kay para kini sa kaluwasan sa tanan, drayber, pasahero ug pedestrians.

Apan kinahanglan gyud pribadong mga kompanya maoy mopatuman aning MVIS nga mga negosyante man ni sila? Sa matag violation kwarta para nila.

Nganong dili nalang ang LTO ang mag-inspeksyon? Ang gobiyerno ug ang publiko pay makabenepisyo gikan sa matigom nga multa dili ba?