EDITORYAL - Ang intensiyon maoy importante

Usa ka maayong desisyon ang gihimo sa Sinulog Foundation Inc. nga dili na ipadayon ang Grand Sinulog Showdown nga gikatakda untang himoon sa South Road Properties.

Sa uwahing talaan sa mga bag-ong kaso sa napositibo sa coronavirus,miabot og 35 ang napuno sumala pa sa Department of Health Central Visayas.

Resulta kini sa pagpaluag sa quarantine measures sa milabay nga kapaskohan nga diin gisuspenso ang quarantine passes ug nilugak gyud ang pagbantay.

Karon duna na say bag-ong strain sa coronavirus nga mas daling makatakod, mas kuyaw kaayo nga daghan ang mga tawo sa gawas.

Karong semanahona nagsugod na ang mga kalihokan sa Sinulog 2021, usa niini ang sadya ug gikahinamang ritual showdowns sa nagkadaiyang contingents.

Apan tungod sa hulga, daghan sa mga Sugboanon ang nanawagan sa mga opisyales sa dakbayan nga dili lang kini padayunon.

Dili kalikayan nga magdasok gihapon ang mga manan- aw sa SRP kun ipadayon kini. Mabutang sa peligro ang tanan busa husto nga desisyon kining gibuhat sa siyudad.

Makasabot ra ang Balaang Bata tungod sa sitwasyon ug daghan ang nagtuo nga dili buot sa Ginoo nga mangasakit ang mga tawo tungod lang sa pagpakita og debosyon.

Mahimo ra bitaw kining padayunon apan di na kinahanglang mag-abot tanang contingents sa SRP, kondili i-live nalang pinaagi sa online ang ilang pasundayag diin sila nanukad o kung asa sila gikan nga barangay.

Daghan pang Sinulog nga moabot, di makalimtan ang tradisyon nga pag Sinulog bisan di kini buhaton karong tuiga.

Ang debosyon wala o dili makita pinaagi lang sa sayaw kondili sa intensiyon sa matag deboto nga makahalad sa bisan unsang paagi.