Sunda ang lagda

Masulob-on ang Pasko alang sa usa ka pamilya didto sa dakbayan sa Lapu-Lapu human mamatay ang usa ka sakop niini atol sa pag-buto sa mga firecrackers nga ilang gibuhat sulod sa ilang panimalay sa niaging semana.

Patay ang 13-anyos nga batang lalaki samtang laing duha ang naangol atol sa maong insidente. Matud pa nga kamulong nagbuhat ang pamilya og pabuto nga “Judas Belt” sa Barangay Babag sa dihang aksidente nga mibuto kini ug miangol sa mga biktima.

Lain na usab kining ngilngig nga panghitabo sa industriya sa pagpamuhat og pabuto ug mga pyrotechnic material dinhi sa Sugbo. Kining maong hitabo midugang na usab sa datos sa mga firecracker incident nga naglikos niining maong industriya.

Ambot kun aduna bay permiso gikan sa local nga pangagamhanan ang maong pamilya pagbuhat og mga pabuto ug pyrotechnic material sulod mismo sa ilang panimalay. Dili ba nga gidili man kini sa mga residential area tungod sa ka delikado niini?

Gumikan sa maong hitabo, gusto ni Mayor Junard Chan nga estriktohon ang pagpatuman sa ordinansa nga nag-regulate sa paghimo sa mga pabuto ug ubang pyrotechnic materials sa dakbayan.  Manghinaut lamang kita nga dili na masubli ang maong insidente.

Ang problema man gud mao nga dili agresibo ang pagpatuman sa maong balaud.

Sa akong naobserbahan, ayha na mangusog ang otoridad pagpatuman sa balaud kun aduna nay mahitabong insidente.

Hinuon admitido ang otoridad sa ilang kakulangon. Kini nunot usab sa kakulang sa resources pag-monitor niadtong nagbuhat sa mga pabuto.

Kini wala pay labot sa pakawalay kooperasyon mismo sa mga anaa sa industriya.

Mao nga dili lamang nato ibasol sa kagamhanan ang mga panghitabo.

Dako usab ang papel nga gihuptan mismo sa mga nalambigit niining matang sa panginabuhi, nga angayan silang mosunod sa mga lagda alang usab sa ilang siguridad.