Disyembre na sugod ugmang adlawa ug daghan na usab nga mga kalihokan ang ipahigayon isip pahinungod sa Pasko.
Apan tungod niining coronavirus disease o COVID-19, mausab ang kamada sa atong pagselebrar sa Pasko.
Mipahimangno na ang kagamhanan nga kinahanglang magbantay kita sa atong pagselebrar sa Pasko kay basin ang mga panagtapok mao unya ang hinungdan sa pagkatap sa makamatay nga sakit nga wala pay tambal hangtud karon.
Gani adunay mga local government units dinhi sa Sugbo ug sa tibuok nasud ang midili na sa mga Christmas party sa ilang mga lugar.
Gumikan usab kini sa kahadlok nga mosaka unya ang mga kaso sa COVID-19 sa ilang mga dapit.
Sa susamang isyu, wala magkasinabot ang mga opisyales sa lokal ug nasyonal kun angayan ba nga ipahigayon ang Misa de Gallo sa mga simbahang Katoliko.
Adunay gusto nga ipahigayon gayud ang Misa de Gallo ug adunay misuporta usab sa lakang nga iuktaba una kini tungod sa coronavirus disease.
Dili ikalimod nga nagdala gayud og dakong kahasol ang COVID-19 sa atong panglihoklihok karong panahona. Sulod na sa halos napulo ka bulan, nausab ang atong naandang gawi.
Dili na gani kita halos mogawas sa atong panimalay sa kahadlok nga matakboyan sa maong sakit.
Apan pabiling resilient ang tawo bisan pa man ning maong maldisyon nga mipatay na og subra sa usa ka milyon sa kalibotan.
Bisan pa sa mga dakong kalamidad, ania pabiling nakasugakod ug nagbarog ang humanidad.
Sa ka high-tech nato karon, walay dili imposible nga atong mabuhat. Kay lagi limitado ang atong panglihoklihok, nakan-on kita pagpuyo sa balay.
Apan busy usab kita sa paggakos sa mga panghitabo sa gawas gumikan sa atong mga gadget.