EDITORYAL - Legasiya ni Del Mar

Nawad ang ang Sugbo ug usa ka maayong magbabalaod nga mobarog alang sa kaayohan dili lang sa taga Sugbo kondili hasta sa katawhang Pilipinhon.

Si Cebu City North District Rep. Raul del Mar dili lang matawag nga beteranong magbabalaod kondili usa gyud sa mga talagsaon nga matang sa magbabalaod.

Sa iyang siyam ka termino pagkakongresista isip reprsentante sa amihanang distrito sa dakbayan sa Sugbu, wa kini sukad sukad mo-absent sa mga sesyon.

Nagpakita lang kini kun unsa ka seryoso si del Mar sa iyang panerbisyo sa publiko.

Butang nga lisod sun-on sa ubang mga bagitong mga magbabalaod nga karon palang gani, nagsige na og absent tungod sa lainlaing rason.

Gani, posibleng siya lamang ang kongresistang nahibaw-ang perpekto og attendance sa tanang sesyon

Sa iyang distrito, naila si del Mar nga simple. Dunay mga higayon nga mitambong kini og mga kalihokan diin siya imbitado nga simple ra og sapot ug wa sab laing kauban.

Ang siyam ka termino ni del Mar nga way pildipildi sa matag eleksyon, timaan lang sa dakong pagsalig kaniya sa kinabag-an sa iyang mga konstituwente.

Dili ingon niini kasayon mamentinar ang pagsalig kung dili maayong lider si del Mar.

Ang iyang mga nabuhat para sa iyang mga konsituwente, adunahan man o kabus matawag na nga legasiya sa iyang pagka siya.

Lisod kining masunod ni bisan kinsang gustong mosunod sa iyang mga yatak diha sa distrito.