Pagpangandam sa Pasko

Pipila ka semana gikan karon ang saulogon sa kalibotan gihisgotan sa mga linya sa awit nga “the most wonderful time of the year.” Karon palang, ang tanan nangukay na sa ilang mga bodega o mga kahon diin gihipos ang mga dayan-dayan sa Pasko, duna nay nagplano sa handa ug tapok-tapok.

Apan ning tuiga, lahi ra. Di nato kapugngan ang kangiob sa kalangitan tungod aning hulga sa Covid-19. Samtang dili man tuod niini mapugngan ang mga tawo pagselebrar sa Pasko, apan tingali ipaagi na nila kini sa pagdaginot – menus kaayo ang mga butang apan mas bug-at ang paghatag og bili sa tinud-anay nga kahulogan sa Pasko, nga mao ang selebrasyon sa pagkatawo ni Hesu Kristo, ang atong Manunubos. Nagsingabot na ang Pasko ug kinahanglan nato ning pangandaman. Dili lang sa kalingawan. Preparasyon kini sa pagkahimugso ni Hesus, labaw sa tanan, ang pagpamalandong sa kahulogan sa okasyon ug kanunay magmabinantayon.

Atong kutloon ang Parable of the Wise Virgins.  Samtang nagpaabot sa pamanhunon, lima ka dalaga nga nagdala og lampara ug duna silay reserbang lana para niini, samtang ang laing lima wala magdala. Dihang naabot na ang pamanhunon, ang lima nga walay dalang reserbang lana para sa lampara miawop na ang dagitab sa ilang lampara. Ang pagkamabinantayon nagpasabot nga kanunay alerto, wala magduka, ug nahibawo sa mga nanghitabo sa palibot.

Mao kini ang diwa sa tanan.  Kausa ra ta molabay aning kalibotana, wa ta masayod kun kanus-a ta kuhaon sa Ginoo. Ang pila ka segundong sa panumdoman nalang u gang ugma damgo pa. Sa atong kinabuhi karon, nagkahulogan kini atong pangitaon ang Ginoo ug hatagan kini og tiud-anay nga pagtagad.

Kinahanglang makita nato ang Ginoo diha sa atong mga kabus nga mga kaigsuonan didto sa Luzon nga biktima sa grabeng pagbaha ning bag-o lamang tungod sa bagyo. Nagkinahanglan sila kanato karon.

Ang atong preparasyon sa Pasko ato pasupotan sab og spiritual ug dili lang kalibotanong butan. Buksan ta atong mga kasingkasing ug mopasaylo, basulan ang nahimong bati ngadto sa isig kaingon. Kun kita andam, wa nay bili ang oras kay andam na kitang dawaton ang Ginoo. Lab-as pa sa akong panumdoman ang mga Pasko nanglabay nga puno sa kalipay kauban akong pamilya, mga higala.

Samot na ang Pasko human natapos ang kalibotanong gubaty. Bisan sa kadaot, tanan naninguhang mopahiyom  bisan paman sa kalisdanan kay Pasko naman. Sa balay, gipakita kanamo nilang Mama Pining ang simple apan makahuloganong selebrasyon.

Saw-an namo ang mga lami-ang handa nga manok ni Mama bisan og naglaway kami sa nanimahong bag-ong gilutong “hamon” gikan sa kusina sa among silingan. Mao ra, grande ang kahulogan bisan sa simpleng handa.

Nahinumdoman pa pud nako kaming duha ni Eddie motambong sa siyam ka adlaw nga Misa de Gallo diha sa Cebu Metropolitan Cathedral. Nindot kaayo kay dunay mga higanteng paper mache camels ug mga parol dala sa grupo ni Vicente “Noy Inting” Rubi, ang composer sa Cebuano Christmas carol nga “Kasadya Ning Taknaa.”  Mao kini ilang awiton sa prosisyon human sa isa. Mohapit gyud mi pirme ni Eddie sa putohan diha sa eskina sa D. Jakosalem ug Manalili Streets.  Ini og abot sa balay sa akong Lola Ande duna na siyay giandam nga bag-ong gihaon nga “sikwate,”

Layo ra kaayo ang mga Pasko sa karaang panahon itandi sa karon. Simple lang kaayo ug gisaulog pinaagi sa tradisyonal nga paagi apan wala mawala ang kasadya sa okasyon.

Sa makausa pa, kinahanglang ang atong preparasyon sa kapaskohan daghan ang para sa kasingkasing ug espirituhanon—kay mao gyud kini ang diwa sa Pasko.--IBM