Halapad nga kadaut ang nahiaguman sa mga lalawigan didto sa Luzon sa dihang mikusokuso sa nakalabay’ng mga adlaw ang supertyphoon nga si Rolly, ang giingong labing kusog nga bagyo sa kalibotan karong tuiga.
Sa makausa pa, bilyones ka pesos ang danyos nga dala sa maong katalagman, gikan sa nangapukan nga liboan ka panguma ug ubang panginabuhian hangtud sa mga inprastraktura sa kagamhanan sama sa mga highway, tulay ug mga tulonghaan.
Kini wala pay labot sa mga kinabuhi nga nakalas sa pagkusokuso sa maong bagyo.
Sa akong pagsulat niini, dili momenos sa 20 ka tawo ang namatay sa paglapdos sa bagyo didto sa Bicol ug mga kasikbit nga lalawigan sa southern Luzon.
Tungod niini, dakong tabang ang gikinahanglan sa milyones ka molupyo didto.
Daghan kanila ang nawad-an og mga panginabuhian.
Apan ang labing pait mao nga adunay pipila kanila ang nawad-an gayud og mga sakop sa ilang panimalay.
Hinuon, abtik usab ang Sugbo nga miresponde sa panawagan pagtabang sa atong mga kaigsoonan nga biktima sa dakong kalamidad didto sa Luzon.
Duha sa mga ahensiya nga misaad og tabang mao ang Police Regional Office-7 ug ang Office of the Presidential Assistant for the Visayas.
Si PRO-7 director Brigadier General Albert Ignatius Ferro mipahibalo nga ang iyang opisina mopadala og usa ka gatus ka polis aron pagtabang sa mga sakop sa PRO-5 sa search and rescue and relief operations.
Kini pinasikad usab sa order ni PNP Chief General Camilo Pancratius Cascolan.
Adunay mga relief packs ug ubang donasyon ang ipadangat sa PRO-7 ngadto sa mga probinsiya sa southern Luzon.
Nanawagan si Ferro ngadto sa publiko sa pagtunol og donasyon isip tabang ngadto sa mga biktima ni Bagyong Rolly.
Nakig-alayon karon ang PRO-7 sa OPAV alang sa transportasyon sa mga PNP personnel ug mga hinabang padulong ngadto sa Bicol Region.
Gani, makig-coordinate si OPAV chief Secretary Michael Dino sa Coast Guard alang sa daling paghakot sa mga hinabang gikan dinhi.
Hinuon, kun buot natong sabton, dakong obligasyon nato ang pagtabang sa atong nga kaigsuonan nga biktima ni supertyphoon Rolly didto sa Luzon.
Kini gumikan kay ang pagtabang panahon sa katalagman hagbay rang kabahin sa atong kultura isip mga Pilipino.