Tayaon, karaan di na pabalikon

Luyo niining kontrobersiya nga gikalambigitan sa usa ka kompanya sa passenger bus sa Metro Cebu, ilabina sa dakbayan sa Sugbo, daghan ang panawagan karon nga angay na kuno nga ibalik ang mga public utility jeepneys sa kadalanan.

Dili ikalimod nga nagnihit gayud ang mga pampubliko nga sakyanan dinhi sa dakbayan taliwala sa paghunong sa operasyon sa liboan ka PUJ gumikan sa padayong pagkatap sa corononavirus disease o COVID-19.

Ug dili usab nato ikalimod nga dakong kalbaryo karon alang sa liboan ka mga mamumuo ang kakulang sa pampasaherong sakyanan sa ilang pagtangka sa ilang tagsatagsa ka trabaho ug pagpauli sa ilang panimalay.

Kini bisan pa man sa pagpadagan sa mga passenger bus sa kadalanan sa dakbayan. Gani, matag bunok sa ulan, makaluluoy kadtong mga commuter tungod kay dugay silang makasakay tungod sa nagnihit nga masakyan. Hinuon, mitugot na ang lokal nga kagamhanan nga makadagan kadtong subra sa usa ka libo nga jeepney agi og sanong sa mga panawagan nga pun-an ang mga pampasaherong sakyanan sa dakbayan, ilabina nga hinahinay nang milurang ang coronavirus.

Apan kinahanglan nga makapasar sila sa ebalwasyon aron marehistro. Kini tungod kay nakahukom ang lokal nga pangagamhanan nga kadto lamang roadworthy nga mga jeepney ang tugotan nga makapamasada pag-usab.

Sa laing bahin, angay lamang usab nga kadto lamang maayo pa ug dili mga kagangkagang ang pabalikon sa karsada. Kadtong mga tayoon na ug mobuga og itom nga aso ang angay na lamang nga idispatsar gumikan kay makadaut na usab sa katawhan ug kinaiyahan.

Hinuon dili usab maguol kadtong liboan ka mga drayber sa mga PUJ nga dili na tugotan nga makabalik sa kadalanan. Misaad ang pamunoan ni Mayor Edgardo Labella nga adunay livelihood program nga gitagana alang kanila.