EDITORYAL - Negatibong epekto sa learning modules

Karong mga panahona kinahanglan nang pangandaman o mangita og paagi ang DepEd nga masustinir kining distance learning niini nga gipatuman tungod aning hulga sa panglawas dala sa pandemiya sa novel coronavirus (Covid-19).

Sa sayo pa, gipahibalo ng daan sa DepEd nga magkinahanglan ang ahensiya og P35 bilyones nga budget aron magpa-printa sa mga self-learning modules alang sa 13 milyones ka tinun-an sa pangpublikong mga tunghaan.

Tungod kay dili man tanang pamilya bulahan nga adunay kwartang ikapalit og gadgets o dunay access sa internet, nangita og pamaagi ang DepEd nga di mahikawan o mabiyaan sa edukasyon ang mga kabus nga tinun-an.

Mao nga dali kaayo silang nakaingon nga ipaagi lang sa modular learning, iprinta ang mga modules sa mga bata. Apan lisud diay karong nakita na kun unsa kadako ang kinahanglanong budget.

Angay mahibaw-an sa publiko nga ang DepEd maoy kinadak-an og pahat sa national budget sud na sa pila ka presidenteng milingkod sa nasud ug wa kini mausab hangtud karon.

Way kwestyon kun kwarta maoy hisgutan, mahatag kini sa gobiyerno para sa DepEd, apan ang modules ginama sa papel, ang papel hinimo gikan sa kahoy nga tagpila ka tuig ayha pa modagko ug mapuslan.

Pipila nalang ka porsiyento sa kayutaan sa Pilipinas ang dunay kalasangan kay sagad nangaupaw naman maong nagkagrabe ang mga pagbaha, pagdahili sa yuta kun tinguwan ug tig-a kaayo ang yuta ug nihit ang tubig sa panahon sa tinghuwaw.

Kun tuohan ang pagbanabana sa ekonomistang ni Senador Ralph Recto, nga usa ka ekonomista, sa tibuok tuig kinahanglang makaprinta ang DepEd og dul-an 100 bilyones ka pahinang modules para sa tanang mga tinun-an sa public schools.

Pila kaha ka milyon ka punoan sa kahoy ang kinahanglang pamutlon alang niini? Unsa kahay epekto niini sa kinaiyahan human sa usa ka school year?

Dili kini problema lang sa DepEd, maayo sab tingaling motabang ang mga pribadong sektor ilabi na ang mga telecommunications companies pagtabang sa mga kabus nga ginikanan aron makabaton og gadgets alang sa distance learning.

Tungod kay dili masustinir sa kinaiyahan kun sige nalang pamutlon ang mga kahoy para sa mga modules.