Apil sa lista sa mga badlungon
Sukwahi sa pangangkon sa pamunoan ni Presidente Rodrigo Duterte nga kontrolado na nilang COVID-19, wa maapil ang Pilipinas sa listahan sa 19 ka nasud nga nakabadlong na sa pandemiya.
Ang lista sa The Lancet, usa sa labing karaan ug kasaligan nga medical journal, nihapnig sa 91 ka nasud nga nihatag og igong kasayoran ngadto sa lima ka hugpong: suppressed, low, moderate, high ug very high.
Giisip ang Pilipinas nga moderate ug gibutang sa ika-66 sa lista pinasikad sa upat ka sukdanan: Gidaghanon sa bag-ong mga kaso pinasikad sa populasyon, gidaghanon sa nangamatay, gidaghanon sa tests (di moubos sa 20 ka tests sa matag bag-ong kaso) ug kapaspas sa tinakdanay.
* * *
Naapil ang atong silingang mga nasud sa mga gipasidunggan nga napahunong na sa tinakdanay: Taiwan, Thailand, Laos, Cambodia, Vietnam, China, Myanmar, Malaysia, New Zealand, Uganda, Togo, Pakistan, Latvia, Luxembourg, Uruguay, South Korea, Finland, Cuba ug Rwanda.
May mga silingan sab natong nalista nga ubos nag mga kaso: Congo, Nigeria, Cote d’Ivoire, Hungary, Tunisia, Senegal, Zimbabwe, Estonia, Indonesia, Kenya, Norway, Japan, Ghana, Slovakia, Ethiopia ug Lithuania.
* * *
Naapil ang Pilipinas sa 37 ka nasud nga nagpadayon pang tinakdanay: Canada, Slovenia, Italy, Australia, Germany, Belarus, Bangladesh, Turkey, United Kingdom, Denmark, Ireland, Greece, Poland, Nepal, Iceland, Bulgaria, Portugal, Austria, Sweden, Czech Republic, Switzerland, Singapore, Iran, Serbia, Netherlands, United Arab Emirates, Morocco, Russia, Saudi Arabia, Ukraine, Pilipinas, Croatia, Belgium, Mexico, Pransiya, El Salvador ug India.
Walo ang gilistang daghan pag kaso: Paraguay, Romania, Kazakhstan, South Africa, Malta, Iraq, Qatar ug Chile. 11 ka nasud ang gihulagwayng labihan kadaghan og kaso: Bolivia, Espanya, Kuwait, Estados Unidos, Argentina, Israel, Brazil, Bahrain, Colombia, Panama ug Maldives.
* * *
Gibasol sa The Lancet ang medical populism nilang Presidente Duterte, US President Donald Trump ug Brazilian President Jair Bolsonaro nga nibabag sa mga lagda pagpanalipod sa kahimsog sa publiko ug nipakatap og sayop nga kasayuran.
Giawhag sa The Lancet ang mga pangu sa kanasuran pagsunod sa tambag sa mga espesyalista ug pagkat-on sa malampusong kampanya sa ubang kanasuran.
Giawhag sab sila paghunong sa mga pangangkon sa mga tambal nga wa pa mapamatud-i aron nga di maduhig sa politika ang pagpangita sa tinuod nga mga tambal ug bakuna.
* * *
- Latest
