Pagkamatinud-anon sa kaugalingon

Dunay amahan ug anak nga dunay niwang kabayo. Usa ka adlaw niana nanglakaw sila ug kay niwang man lagi ang kabayo, ang amahan niingon sa iyang anak nga kini na lang ang mosakay sa kabayo.

Wa pa gani sila makalakaw og layo dunay pundok sa mga tawo nga nihatag sa ilang komentaryo nga ang anak way batasan kay mao ra kunoy nisakay sa kabayo samtang gipalakaw ang amahan nga edaran. Tungod niini nagbaylo na pud sila. Ang anak na pud ang nilakaw samtang ang amahan na pud ang nisakay.

 Pag-abot nila sa uanahan nagbagulbol gihapon ang uban ang kay lagi ang amahan way puangod kay maoy naneguro og sakay samtang ang anak maoy gipaantos og lakaw. Mao nga nakahukom na lang silang duha nga sakyan na lang gyud nila ang ilang kabayo apan pag-abot nila sa unahan ang mga tawo nikomento nga sila walay buot kay lagi nganong gisakyan nila ang kabayo nga wangkig man kaayo kini. Mao nga silang duha naglakaw na lang ug giguyod nila ang kabayo apan pag-abot nila sa unahan nihatag gihapon og komentaryo ang ubang tawo kun nganong wala nila sakyi ang ilang kabayo! Apan padayon na lang sila sa ilang gibuhat. Padayon sila sa ilang paglakaw.

Ang atong kinabuhi ingon nga tawo usahay puno kaayo sa mga tanghaga. Tanghaga tungod kay bisan asa kita padulong daghan gihapon ang mohatag sa ilang komentaryo.

Bisan sa atong paningkamot nga mamahimo kitang maayo apan mismo ang atong kaugalingong pamilya ang mohatag gihapon sa ilang komentaryo ngari kanato. Ug kun mag-agad kita kun unsay isulti sa kadaghanan ngari kanato mao nga mas malisud alang nato ang pagpuyo sa kinabuhing malinawon.

Walay kalinaw labina kun malisud alang kanato ang pag-inusara diha sa atong mga desisyon. Nindot man ang maminaw sa uban apan hibaw-i nga ang dalan sa kinabuhi nga gisubay sa uban mahimong applicable alang kanila apan malisud alang kanato ang pag-awat niini sanglit ang ilang kinabuhi ni ang dalan nga ilang gisubay dili man gyud alang nato.

Ang atong Ginoong Jesus mismo wala man makalikay ning maong bias. Matud niya nga sa dihang si Juan Magbubunyag nagpuasa ug nagpuyo sa kinabuhing yano giingnan man nga giyawaan apan sa dihang siya nikaon ug niinom giingnan man nga palahubog, ulit ug higala sa mga kobrador sa buhis. Ang mga kobrador sa buhis niadtong panahona bati gyud kaayo og reputation kini tungod kay ang ilang hulagway, hulagway man nga masalaypon alang sa mga mata sa mga Pariseo ug mga Magtutudlo sa Balaod.

Mao nga nalain gyud ning mga elitistang grupo sa dihang si Jesus nakigkuyog sa mga kobrador sa buhis. Wala sila makadawat sa maong pakigsandurot. Apan bisan pa niini si Jesus padayon gihapong nagmatinud-anon sa iyang kaugalingong baruganan bisan pa man kun nagkahulogan kini sa iyang kaugalingong kamatayon.