Kon ganahan kang mosubay sa sinugdanan sa kapakyas sa kampanya sa pamunoan ni Presidente Rodrigo Duterte batok sa Covid-19, makatabang ang pagsubli giunsa pag-atiman sa Department of Health (DOH) ang unang tulo ka pasyente nga pulos naggikan sa Wuhan, China niadtong Enero ug Pebrero.
Sa kalangayan sa DOH nga nasubli sa makadaghang higayon sa nisunod nga lima ka buwan, namatay nang ikatulong pasyente (hinigugma sa ikaduha) ug nakapauli na sa China ang unang pasyente (niabot dinhi sa ato liwas sa Sinulog) sa wa pa mahibaw-i nga may Covid-19 sila.
* * *
Sa pagsubay sa close contacts sa unang tulo ka pasyente nitumaw nang dagkong buslot sa contact tracing nga wa matapaki hangtod karon:
Gisabonan sa mga senador si Health Secretary Francisco Duque III human nabisto nga 17% ra sa mga nakaduol ug posibleng natakdan sa tulo ka Chinese nationals ang natultolan sa mga sakop sa Epidemiology Bureau (EB) sa DOH; ug
Masuk-anon nga nisaad si Duque nga may mangligid nga mga ulo sa EB ug dugangan ang contact tracers apan, sama sa nisunod niyang mga pasalig, wa matuman hangtod karon.
* * *
Sa pasiunang timaan sa kamahiligon pagtago sa kasayuran, gilumloman sa DOH ang mga detalye sa mga biyahe sa tulo ka pasyente nga nakapabantay unta sa mga posibleng natakdan:
Ang flight numbers sa mga biyahe gikan sa Hong Kong paingon sa Mactan ug gikan sa Mactan paingon sa Dumaguete (ang Bureau of Quarantine nay nipahibawo sa media); ug
Ang oras sa biyahe sa fast craft nga gisakyan sa unang pasyente gikan sa Dakbayan sa Sugbo paingon sa Dakbayan sa Tagbilaran (ang Bohol Provincial Health Office nay nimantala sa Facebook).
* * *
Kon 17% ra sa gatusan ka pasahero nga nalista sa mga manifesto sa mga ayroplano ug barko nga posibleng natakdan sa unang tulo ka pasyente ang nasubay sa DOH, pila kahay natultolan sa kaliboan nga wa malista nga nakaduol ug posibleng natakdan sa nisunod nga kaliboan ka kaso sa Covid-19?
Pila kaha sa close contacts sa unang tulo ka pasyente nga, kay gipasagdan ra man sa DOH gawasnong niipon sa ilang pamilya ug niduol sa mga silingan, ang nakasugod sa lapad nga tinakdanay sa Sugbo ug Metro Manila?
* * *