Nangita na sa pruweba

Nahuman ug gani nagamit na ang Cebu City Quarantine Center diha sa North Reclamation Area apan matud pa ni Konsehal Nestor Archival, wala pa’y gipakita ang ehekutibo sa gipangayo sa konseho nga dokumento nga nagmatuod nga miagi ang maong proyekto sa ‘bidding process’.  Sa panahon sa emerhensya ug pandemya, mahimong ipagpahigayon ang dinalian nga pagpangompra, apan dili gihapon isalikway ang batakan’g proseso sa subasta.  Ginaingon nga “ang pagka-mamugnaon (creativity) maayo apan dili kini haum sa higayon kon aduna na’y kwentada”.  Na hala, ipasalida na aron walay duda!

Gadanghag lang

Dako ang kahingangha sa usa ka konsumidor sa Maynilad Water pagkakita sa iyang bayronon sa tubig nga mikabat og sobra sa P100,000 kay libo ra man kapin sagad niya’ng mabayran matag buwan.  Miangkon ang Maynilad sa ilang sayop.  Ang agresibo nga pagpaningil, samtang masabtan, wala magtugot sa ilegal nga pagpaningil.  Mahimong maanad ang tawo sa laksot nga mga butang, apan dili gayod niya masagop ang kinaiya sa kadanghag ug pagpabaya (negligence), hilabi na gyud sa mga utility companies.  Palpak pa more!

Langsa kon dili pulihan

Kon ang mga mayor ang pasultihon, buot nila nga wagtangon na ang term limit sa ilang pagka-mayor kay alang kanila dili kini makaayo sa nasud labi na kon ang maayo ang pagkadumala sa lungsod.  Tataw ang tumong sa maong sugyot: ang padayon nga paghupot sa gahom.  Ginaingon nga ang gahum dili makapadunot sa tawo; hinonoa, ang tawo maoy makapadunot sa gahom.  Angayan nga adunay limitasyon ang termino sa politiko, kay sama sa isda, manimaho gayud kini human sa pipila ka adlaw. Baya no!

Ipasuwat aron dili malimtan

Gihangop sa PISTON ang lakang ni Gob. Gwen Garcia pagkumbinsir sa DOTr  nga tugotan na ang mga jeepney drivers pagbiyahe sa ilang mga rota.  Apan midugang ang Presidente sa PISTON nga mas maayo kon masuportahan ang maong laraw sa gobernador sa usa ka pirmadon’g resolusyon ug dili sa pulong lamang.  Alang sa PISTON, adunay dalang kinaadman ang panultihon, “Ayaw’g too basta sulti lang; angayan pamatud-an”.  Kay lage giingon man usab nga “Kon sambugan og kamatuoran ang politikanhong kalihukan, wala na unya’y pamolitika nga mabatyagan. Madahaaan!

“Authorized barriers only”

Giawhag sa PNP ang mga motorcycle riders sa paggamit lamang sa “barriers” nga aprobado sa kagamhanan aron malikayan ang disgrasya kay ang desinyo niini miagi na sa makuti’ng pagtuon, lakip na sa konsepto sa ‘aerodynamics’.  Gisaway ang “logic” sa pagbutang og barrier apan gisustenihan gihapon kini sa DILG bisan sa kahaguka sa ilang argumento.  Ginaingon nga “kadto’ng mga lantip og salabotan, puno sa pagduda ug kabalaka, samtang kadtong mga hanggaw, tugob hinoon sa kumpiyansa ug pagsalig sa kaugalingon”.  Pagkatoytoy!