Takdo 45 ka tuig karong adlawa dihang gilugwa ko sa akong mahal nga inahan dinhi sa kalibotan, pagkadali ra gyud kaayo sa panahon nitungtong naman diay ko sa masipang buto sa kalibre 45, nagpasabot ba nga tiguwang na ko? Hehe bitaw numero ra kini ang importante nga naabot ko niining edara.
Apan morag kuwang ra ang panahon nga daghan pa ang gikinahanglan nakong buhaton nga wala pa gyud matuman.
Sa paglingi nako sa akong kagahapon dunay mga kalamposan taliwala sa mga pagsulay nga naagian hangtod nakaabot ako karon sa laing panid sa katuigan sa akong kinabuhi.
Hinuon walay kabutangan sa akong pasalamat ngadto sa Labawng Makagagahom ug sa Inahang Langitnon nga ang tanan nga akong gipangayo sukad sa una gihatag kanako.
Nakalampos ko sa pagtuon bisan og kabus kami pero napahuman ko sa pag-eskwela sa akong mga gikinakanan pinaagi usab sa suporta sa akong mga maguwang kay kon wala sila wala usab ako karon.
Natuman ang akong gipangaliya nga makasulod og trabaho isip tulay sa mga balita diin nagsugod ko sa radyo, ang unang estasyon ang Bombo Radyo dayon sa DYLA ug sa Aksyon Radyo.
Una kong nakatilaw sa telebisyon isip on-call reporter kaniadto sa ABC 21 apan wala molanat og dugay kay nag usab man og management o nag reformat sila.
Usa ka gilodhan nako ug gipangayo pinaagi sa pagpangama sa Mahal nga Berhin Maria nga makasulod unta ko sa dream company nga mao ang GMA Kapuso station.
Wala pakyasa ang akong giampo diin nahimo gyud ko nga regular employee sa estasyonan.
Nahatagan og break isip reporter ug kaniadto host sa morning show sulod sa pito ka tuig.
Kong sa una akong pangandoy nga makareport lang ko sa programa sa akong idolo nga si Kapusong Bobby Nalzaro, gihatag usab nako ug gibongga pa gyud kay nahimo ko nga co-anchor sa Balitang Bisdak human gibutang ko sa position sa among Vice President ug Regional Head Oliver Victor Amoroso.
Pipila lang kini sa gipangayo nako sa Ginoo nga iyang gihatag kanako ug labaw sa tanan makaangkong og maayong pamilya.
Sa kaayo nga gihatag kanako, unsaon man nako sa pagbayad. Hinuon wala man magpaabot ang Ginoo og bayad pero sa dako nako nga kakuwangan Kaniya, unta makahimo ko og butang nga makasukli sa kaayo sa Dios kanako. Mao ni ang akong goal nga mamahimong alagad sa Ginoo, dili man kinahanglan nga mahimong pari kon dili isip usa ka sulogoon sa simbahan.
Ang pag-alagad usa man ka calling nga pangandaman aron mamahimong takos nga matawag og servant of God.
Panahon na nga palamboon ug kab-oton na usab nako ang aspetong espiritohanon.
Kanunay usab nakong pasalamatan ang akong mga ginikanan nga maoy nagdala nako niining kalibotan bisan og wala na sila pero kanunay silang nag bantay kanako.
Ang akong inahan mitaliwan niadtong nakalabay’ng tuig duha ka adlaw sa dili pa ang akong birthday maong sakitan pa ko mag celebrate sa akong adlawng natawhan kay mao man gyud to ang manawag nako og una aron mo-greet. Sa ika 45 ka tuig nako niing kalibotan, bugtong wish nako mao ang kaluwasan sa tanan gikan niining pandemic ug segurado nga ihatag kini sa Ginoo.