Kini maoy paghulagway sa mga tigpaniid sa kalihokan sa dakbayan sa Sugbo sa kontrobersiyal nga tuob kits nga unang gikataho nga gipalit sa kagamhanan apan takwahaw lang nga nahimong donasyon.
Makalingaw tungod kay nag-iyahay ang mga opisyal og salida iyawat makakuha og kredito, pamugaspugas sa sunod nga eleksiyon.
Si Konsehal Jerry Guardo, kinsa hugtanong nagduso sa tuob isip usa ka paagi pagtabang aron malikay sa COVID-19, maoy migawas nga nangamahan sa inisyatiba pagpamalit sa 1,000 ka mga tuob kits sa kantidad nga P2,500 matag-usa ka set diin ang kinatibuk-ang kantidad sa transaksiyon moabot og P2.5 milyones.
Duna pay mga hulagway nga nanggawas sa social media nagpakita ni Guardo nga mipakita atubangan ni Labella ug sa ubang mga opisyal sa dakbayan unsay tukmang paagi paghimo sa tuob.
Si Konsehal Joel Garganera duna say post sa Facebook nagpasiatab sa mga tuob kits nga giapud-apud sa dakbayan ngadto sa mga barangay isolation centers.
Basi sa iyang post, regalo sa dakbayan ug ni Mayor Labella ang maong mga tuob kits aron pagtabang sa mga pasyente nga mamaayo og dali sa ilang balatian.
Dihang duna nay misugod og pangutana nganong labihan ka mahal sa presyo sa tuob kits, si Guardo misuway pa pagpasabot nga kini tungod kay ang kits naglakip ni og takuri nga de kuryente, plastic nga lingkuranan, gamay nga planggana, tualya ug mga labakara.
Tungod kay bisan unsaon og kwenta mahal ra gyud ug maisip nga pag-usik-usik sa kwarta, nagkadaghan ang misaway sa dakbayan hangtud nga wa nay ganahang mangangkon kinsay responsabli sa transaksiyon.
Mismo si Guardo nga maayo kaayong mipasabot sa media nganong niabot og P2,500 ang presyo nanghunaw na.
Matud niya nga ang ilang gihimo sa konseho mao lang ang pag-awhag sa mayor nga tun-an ang benepisyo sa tuob ug wala siya mosugyot nga mamalit og kits.
Ang mayor nanghunaw sab ug mimando nga imbistigahon. Misaad siyang di bayran ang supplier. Apan unsay atong kasiguroan nga wala pa ni mabayri sa dakbayan?
Si City Legal Officer Rey Gealon dunay pampakalma nga pahibawo. Di kuno angay'ng maguol ang katawhan kay wala diay to palita sa dakbayan.
Gi-donar kuno ang maong mga tuob kits sa supplier nga maglisud sila pagtug-an sa pangan.
Makalagot tungod kay daw sa nakaminus sa katawhan ang atong mga opisyal.
Tungod kay nabunggo ang ila untang pag-usik-usik sa kwarta ug pagpaburot sa presyo kalit lang nga gidonar?
Kun tinuod nga gidonar ug wala bayri sa sekreto ang maong mga kits, nganong di ka presentar ang dakbayan sa deed of donation?
Ug kun gidonar ang maong mga tuob kits, nganong wala masayod ang mayor?
Nganong importanteng masayran sa publiko kinsa ang donor? Kini aron atong masayran wala bay pabor nga gipangayo gikan sa dakbayan bugti sa donasyon.
Wala ni kalainan sa pagdeklarar sa mga politiko kinsay nihatag nila og pundo pagtabang sa ilang kampanya atol sa eleksiyon.