Buhong nga industriya sa plasma
Nahibulong ang mga molupyo sa Sitio Zapatera sa Bo. Luz, ang giilang unang epicenter sa mga kaso sa COVID-19 sa Dakbayan sa Sugbo, dihang nihunong sa ilang tungod ang luho nga mga sakyanan ug nanganaog ang posturawo nga mga sakay.
Gipakaingon nila nga naghatod og mga hinabang alang sa mga silingan nga gi-lockdown. Apan way bitbit ang mga nangabot. Igo lang nangutana hain nagpuyo ang mga naayo na sa COVID-19.
Way bisan usa nilang nagpaabot nga mao na toy pagsugod sa bag-ong industriya sa Bo. Luz: Ang pagpamaligya og plasma.
* * *
Nahibaw-an sa mga molupyo nga ang mga nangabot mga sakop o mga sinugo sa adunahang mga pamilya sa Sugbo nga may mga paryente nga nataptan sa COVID-19, kasagaran mga ginikanan ug mga apohan nga tandugon ang kahimtang sa panglawas.
Ang pasiunang panagana sa mga naayo sa COVID-19 napapas dihang gipasabot sa kamapuslanon sa plasma kay may antibodies nga makaluwas sa mga pasyente nga seryoso ug kritikal ang kahimtang.
Ang unang hugpong sa donors nihangop sa kahigayonan nga makatabang ug bisan sa kakabos nitugyan sa mga tagtungod unsay ikatunol nga bugti.
* * *
Apan ang nisunod nga mga adlaw inanay nga nakapaamgo sa mga naayo sa COVID-19 sa dakong kahigayonan sa pagpahimus sa dinaliang panginahanglan sa plasma.
Mao nga ang nisunod nga mga nangita og plasma donors gibungatan na nila og presyo.
Nagsugod silag P5,000. Human sa pila ka adlaw, nahimong P10,000. Dayon nisaka sa P15,000. Human sa usa ka semana, nahimong P20,000. Human sa usa ka adlaw, P30,000 na. Sa niaging semana, nahimong P40,000. Karong semanaha P80,000 na.
* * *
Nisaad ang Regional Blood Center (RBC) sa Department of Health (DOH) sa Central Visayas nga imbestigahon ang mga transaksiyon sa plasma nga klarong nakalapas sa balaod nga nagdili sa pagpamaligya og dugo.
Apan mga opisyal sa Bo. Luz niingon nga lisod pamatud-an ang mga transaksiyon kay way resibo ni kontrata ug pulos tak-om ang mga namalit ug ang mga namaligya og plasma.
Makapa-alarma ang sulti sa mga nasina sa kabuhong sa ilang mga silingang plasma donors nga maayo pa nga magpatakod na lang sila sa COVID-19 aron nga makakuwarta sab.
* * *
- Latest
