Ang milagro sa rosaryo nga akong nasinatian

 “Never doubt what one prayer can do.” Kini ang linya nga akong nabasahan sa sige nako og ukay sa social media, credit to the owner nalang. Pero naigo gyud ko niini kay taliwala sa panghitabo karon, usahay ako wala na masayod hangtod kanus-a makasugakod bisan pa sa sige nato og pag-ampo.

Mag rosaryo kada gabii aron ilikay sa makalilisang nga virus. Apan taliwala sa mga pangalyupo nagpasulabi gihapon ang akong kahadlok dili sa akong kaugalingon kon dili sa akong pamilya usab. Ipaambit nako ang literal nga milagro nga akong nasinati bag-ohay lang, siguro ang uban moingon nga hunahuna ra nako ug bunga lang lang sa akong kahingawa pero bahala na sa motuo ug sa dili.

Sukad sa paglipang sa COVID-19 sa dakbayan sa Sugbo ako ug ang akong cameraman na ang kada adlaw anaa sa war zone hangtod milipang ug mikuyanap ang virus nga miabot na og dul-an sa lima ka libo ang nataptan.

Gani ubay-ubay na sa mga sources nga among nanga-interview ang nataptan sa virus nga makugang nalang mi nga masayran nga si polano ug polana nagpositibo sa virus hinungdan nga makapraning gyud kay nakamugna kini og pagduda nga basin natakboyan na ko sa virus.

Hinuon extra ingat ang gihimo namo kay gawas sa mag-facemask, naa pa gyuy faceshield ug bonnet akong isul-ob ug bitbit ang alcohol nga maglisod na gani sa pag ginhawa sa doble-doble nga panagang sa nawong aron dili masodlan sa virus.

Dili malikayan nga mobati og emptiness kay sukad sa Pebrero wala na gyud ko kahalok sa akong mga anak ug sa akong asawa isip precaution and protection nila.

Miabot sa punto nga gusto ko makaseguro sa akong health condition maong gustong gusto ko mo undergo og COVID-19 test but at the back of my mind nitalaw sad ko kay basin dili ko kadawat sa resulta. Usa ka gabii dihang magrosaryo na mi, nalangan ko kay ang rosaryohan nabubod man kay nasulod ang stainless nga sumpay sa laing beads nga impossible gyud tangtangon busa gipasagdan nalang. Samtang dihang nakahukom na ko nga magpa-test, kulba pero gisalig nako ang tanan sa Ginoo nga hatagan ko og kusog sa pag dawat sa resulta.

Pila may estorya migawas ang resulta ug praise God wala ko Niya pasagdi, negatibo ang resulta, God is great!

Samtang sa among pagrosaryo, gikuha sa akong asawa ang rosaryohan kay iyang suwayan sa pagbadbad ang pagkabubod niini, dakong kahingangha niya nga nahapsay na ang rosaryohan nga nabalik sa kanhi niining porma.

Abi niya kon ako ang nagtangtang sa pagkabubod niini pero ako siyang giingnan nga ang Ginoo maoy naghapsay niana dungan sa paghapsay Niya sa akong gibati ug panghuna huna kay karon nigawas nga negative ko sa COVID-19.

Nitulo ang luha sa akong asawa kay wala man siya masayod nga nag-agi og tumang kabug-at sa pagbati nga gipagaan sa Ginoo.

Ang Ginoo mao ang atong kaluwasan nga maminaw sa atong hugot nga pag-ampo sama sa hingpit nga pagkawagtang na sa virus dinhi sa kalibotan.