Gisaway sa labing dakong kahugpongan sa mga medical professionals sa nasud ang gihimong pagpakauwaw ni Gobernador Gwen Garcia sa duha ka mga doktor nga nanaway sa iyang pagduso sa tuob isip alternatibong paagi aron paglikay sa COVID-19.
Sa usa ka pamahayag, ang Philippine Medical Association (PMA) pinaagi sa presidente niini nga si Dr. Jose Santiago, Jr. ug sa secretary general nga si Dr. Ricardo Batac misaway sa gihimo sa gobernador.
Duha ka punto sa pamahayag sa PMA.
Una, ilang gikondinar ang gobernador tungod sa pagpakauwaw sa duha nila ka membro.
Ikaduha, ila sab nga gikondinar ang opisyal tungod sa pagduso sa tuob isip alternatibong panagang sa sakit.
Nakasabot ko sa unang punto nga isip ilang mga membro, obligasyon sa PMA ang paglaban sa duha ka mga doktor.
Apan angayang pahinumduman sab ang PMA nga isip organisasyon duna sab silay responsibilidad pagsusi usa unsay sinugdanan sa kontrobersiya.
Tinuod dili husto nga pakauwan si bisan kinsa atubangan sa publiko, doktor man o ordinaryong tawo. Apan kun gisusi sa PMA ang lintunganay sa hitabo sa wala pa sila mokondinar sa gihimo sa gobernador, ilang masayran nga ang duha nila ka mga membro maoy unang nagbinastos ug nanghulga pa nga sagpaon ug dauban aron malargo og cremate ang gobernador.
Kun sa ilang tan-aw, kumo mga alagad sa medisina, sayop ang gihimong pagpromote ni Garcia sa tuob, kinahanglan ba nga manghulga nga sagpaon ug dauban ang gobernador?
Sa ikaduhang punto, unsa may angayang kondinahon sa pagduso ni Garcia sa tuob isip alternatibong paagi pagpalig-on sa immune system aron paglikay sa sakit?
Ang atong balaud mismo nagdasig ug nagprotehir sa alternatibong paagi sa pagpanambal.
Di tambal ang tuob sa COVID-19 apan napruwebahan na nga makatabang ni paghatag og alibyo sa nagping-ot nga ilong ug makapalu-ag sa pagginhawa.
Kun makahatag ug makahatag og alibyo nganong mangugat man ang ubang mga doktor batok niini?
Tungod kay wala pay nakit-ang tambal alang sa COVID-19, dili ba mas maayo ang natural nga paagi kay sa paggamit og synthetic nga medisina?
Gawas nga way gasto sigurado sab nga way dautang side effect sa lawas sa tawo.
Tinuod ba gyud nga nagpakabana lang sila o dunay personal nga mga interest nga giprotehian?
Dili kaha nga nabalaka lang sila nga maibanan ang ilang pabor gikan sa dagkong mga pharmaceutical companies nga maoy mogasto sa ilang mga lulinghayaw paingon sa gawas sa nasud?