Sugod karong adlawa, ang Cebu City, nga gihulagway nilang Mayor Edgar Labella ug sa iyang idolo nga si Presidential Assistant Mike Dino nga labing andam sa COVID-19, mahimo nang labing gikuti-kuti.
Inay sa naandan nga pagsalikway o pagdason lang sa Inter-Agency Task Force (IATF) sa awhag ni Labella nga libkason ang enhanced community quarantine (ECQ) sa Cebu City ug ibalik sa general community quarantine (GCQ), gisugo na hinuong National Task Force (NTF) pag-anhi ug pagsusi sa tibuok semana karong semanaha giunsa pagduma ni Labella ang nagsulbong nga mga kaso sa COVID-19 aron paglusad og mas epektibong sulbad.
* * *
Ang bugtong mas sipa nga sagpa kay sa pagbasura sa pangangkon ni Labella nga kontrolado niya ang sitwasyon ug nga mas maayo ang kahimtang sa Cebu City kay sa Metro Manila ug ubang bahin sa nasud mao ang pagpada dinhi og mga opisyal nga mosubli sugod karong adlawa sa tanan niyang gihimo aron makit-an ang dinaliang tubag sa mosunod:
Padayong pagsaka sa bag-ong mga kaso nga nikatap sa mayoriya sa mga barangay sa dakbayan;
Pag-doble sa mga kaso matag unom ka adlaw; ug
Pagkapuno sa mga tambalanan sa mga pasyente sa COVID-19 nga grabe ug kritikal ang kahimtang.
* * *
Ang NTF nga gipangulohan ni Chief Implementer Carlito Galvez gihatagan sa IATF og lima ka trabaho:
Pagsusi sa kahigayonan sa pagtukod og NTF Emergency Operation Center ug pagtudlo og Visayas Deputy Implementer;
Pagtukod og Out-Patient Services (OPS) aron mabalhin sa Temporary Treat and Monitoring Facilities (TTMFs), o quarantine facilities, ang nagkadaghang pasyente sa COVID-19 nga nagpabilin sa ilang pinuy-anan;
Pagtakdo sa managlahing numero sa Department of Health (DOH), Department of Interior and Local Government (DILG) ug NTF;
Mas maayong pag-atiman sa natanggong nga mga molupyo; ug
Higpit nga pagtuman sa minimum health standards sa mga dapit nga daghang kaso sa COVID-19.
* * *
Silang Dino ug Labella ang nisugat, nipahimutang, nipakaon ug nigiya nilang Galvez ug kaubanan sa ilang pagduaw sa Sugbo niadtong Hunyo 11 ug 12.
Maong di silang kapasangil nga sayop ang kasayoran sa NTF.
Mas makauuwaw kon ang lapad nga pagsubli sa NTF mobisto sa mga buslot sa tanang aspeto sa kampanya sa Cebu City batok sa COVID-19.
* * *