Biseklita kuyaw

Kaniadto sa nagpurolpurol pa ko, misulay kog kat-on unsaon pagdrayeb og biskelita. Dihang nakat-on, magsolo na kog biseklita libot sa among lungsod sa Balamban.

Akong mga tiil sa punayg tindak, mamanhod ug mamuypoy.  Kapoy. Pero, enjoy!

Dili tanang dalan aspaltado. Dinhay mga batoon. Busa, dihang nakasugat ko’g bus de pasaheroan samtang naningkamot og likaylikay nga dili makaligis og libaong, gikabig ko dayon sa tuong bahin nga daplin ang gidrayban kong biseklita kay nahadlok masaghiran sa gika-engkuwentrong trak nga duol na kaayo sa akong nahimutangan.

Resulta? Aw misawom ko sa kanal. Maayo gani, kay biseklita ray nabawog. Pero ako? Napangos gyod akong tuhod, uy! Da, tagam!

Sa maong panahon, ang kalungsoran, apil nang amoa, mingaw pa ang dalan. Diyotay rang mga sakyanan (diyep, kotse o trak) ang magbiyahean. Unya, may mga biseklita pa man ganing madisgrasya? Kon dili masaghiran, madam-agan gyod, diin ang sakay kon dili maospital, mamenteryo.

 Unsa na kaha dinhi sa siyudad sa Sugbo karon, diin ang mga karaan ug bag-ong sakyanan nag-anam kadaghan nga nagdagan sa kadalanan? Unya, pun-an pag daghang biseklita? Dili kaha mosamot ang sunodsunod nga disgrasya?

Si Cebu City Mayor Edgar C. Labella nagplano nga mogahin paghimog mga bike lanes para sa mga magbiseklita. Gikalipay kini sa mga tigbiseklita.

Barato ra ang presyo sa biseklita, diin ultimong pobre makasugakod pagpangitag paagi nga makaangkon niini. Nga sa ato pa, mobaha unya ang magdasok nga biseklita sa kadalanan.

Dili kaha makahatag kinig dugang dakong problema sa atong trapiko nga problematic na kaayo daan inig balik nag panagan sa tanang sakyanan?

Angay hinumdoman, nga ang kadalanang naglibot sa siyudad kinahanglan nang palapdan kay pirme mapuno sa mga behikulo labi na panahon sa rush hours. Kini base sa wala pay COVID-19 ug kuwarantinas sa komunidad.

Unya, imbes palapdan, kurtihan pa hinuog porsiyon alang sa mga biseklita? Mosamot kagamay ang agianan para sa mga four wheels? Ug usab, mosamot kabug-at ang kalbariyo sa trapiko nga pas-anon sa mga four-wheel drivers?

Mao kini ang matang sa kakuyaw nga nakit-an sa mga mabinantayong mata. Hinaut unta, nga nakita sab kini ni Mayor Labella.

Iyang hinuktokan sa makadaghan unsay the best buhaton, sa dili pa mopakanaog sa pinaleng desisyon.