Taktakon gyud

Nindot kaayo ang gihimo sa kadagkoan sa Cebu City Transportation Office nga giila nila kadtong ilang sakop nga nakuhaan og hulagway nga nag-angkas sa usa ka motor bisan og may kamandoan nga nagdili niini.

Sa Facebook Page sa CCTO, giila nila ang ilang kawani nga nakuhaan og hulagway nga nag-angkas sa usa ka motor nga mao diay si Kathleen Ashley G. Ramirez, Administrative Aide 1.

Bisan ako nga nakakita sa maong hulagway, nakaawhag gyud ko nga ang maong kawani angay’ng taktakon sa iyang trabaho kay dili siya angayan nga motrabaho sa Cebu City Hall nga dili diay makatuman sa kamandoan sa mayor.

Si Mayor Edgardo Labella maoy niisyu og kamandoan nga sundon nato ang gimando sa Inter-Agency Task Force (IATF)-COVID-19 nga dili usa magpaangkas sa motor kay aron malikayan ang pagpanakod sa coronavirus.

Tinuod, supak ko nga ang asawa, o sakop sa pamilya, did-an pag-angkas sa motor nga gimaneho sa bana, o amahan sa nag-angkas, tungod sa rason nga ang bana ug asawa, ingon man ang ilang mga anak, mag-uban ra gihapon sila sa ilang balay.

Apan kon kawani ka gani sa kagamhanan, angay’ng ka nga morespito sa labaw nimo sa opisina. Law-ay kaayong tan-awon nga ang kawani sa City Hall nag-angkas sa motor ug may marka pa gyud nga CCTO ang gisul-ob niyang jacket.

Nagpakita ra kini sa iyang kaabusado. Tukma ang gihimo sa kadagkoan sa CCTO nga gibutyag nila sa publiko ang ngalan ni Kathleen Ashley Ramirez ug girekomendar nga dili na i-renew ang iyang kontrata aron taktakon sa serbisyo.

Kon ako ang pagbut-on, dili na gani maayong huwaton pa nga mo-expire ang iyang kontrata, kondili, angay’ng patubagon ra siya aron paghatag og “due process” ug kay wa man gyud siya’y maayong rason niini, taktakon dayon sa trabaho.

Ang pagpasaka hinuon og kaso batok sa maong kawani, mora’g dili na lang tingali angay’ng himoon pa.

* * *

Dunay ubang netizens nga mi-post sab og hulagway sa mga nag-angkas sa motorsiklo nga nagsul-ob og T-shirt nga uniform sa City Hall. Apan ang akong ikasulti niana nga lisud kaayo ilhon kon ang mga opisyal sa maong mga kawani dili lang magtagad.

Mao nga gidayeg nako ang CCTO kay pagkakita nila sa hulagway sa babayeng nag-angkas sa motor ug nagsul-ob og T-shirt nga minarkahan og CCTO, gipa-imbestigar dayon nila ug ilang nailhan.

Busa karon, kamong mga traffic enforcer, ayaw ninyo pasayloa ang mga masakpan ninyong mag-angkasay sa motor, bisan og mga kawani sila sa City Hall kay ang inyong kauban taktakon man gani sa serbisyo.