Bili

Tanang baligya ning kalibotan, may presyo. Barato man o mahal, segurado gayod nga may ganansiya ang tag-iya inig ka halin sa iyang tinda.

Daghang kabos nga ang gisaligan sa pagbuhi sa ilang pamilya mao ang pagpaninda og mga ginagmayng negosyo sa aseras ug daplin sa karsada.

Sila ang mga sidewalk vendors, kinsa ning panahon sa kagutom tungod sa pagpangmangtas sa COVID-19, maoy unang nawad-ag inadlawng kapanginabuhian.

Dili tanang pobre nga sama kanila nakadawat og pinansiyal hinabang sa gobiyerno.

Busa, ning duha ka bulan kapin nilang inantos nga wala na silay ikapalit og bugas nga malung-ag, mapugos sila’g gawas sa balay ug mopungko sa sayidwok aron makadalikyat pagpamaligyag prutas ug utanon nga pulos inangkat, yawat may ganansiyang ikapalit bisag duha ka kilo na lang bugas.

Apan subo palandungon, kay pipila kanila giabog sa mga tinugyanan nga tigbantay sa dalan. Ug giimbargo ang unsay ilang gibaligya.

Pastilan, wala lang mahanaw ang presyo sa mga baligya nga ilang inutang, kondili, lakip na ang bili sa monas ginhawa nilang paningkamot nga mabuhi, nawala usab.

Tungod sa COVID-19, nakalimtan sa pipila kanato ang sugo sa Ginoo nga mao ang paghinigugmaay ug pagtinabangay sa usag-usa.

Imbes kita mohatag, kuhaon pa nato ang unsay para sa uban.

Inay tabangan aron makabangon, gitiwasan hinuon pagduot! Hinuon, dili tanan.

Sama sa gibuhat sa suod kong doktor, kinsa gipangutana sa iyang mga katabang nganong gipakyaw niya ang tanang baligyang silhig nga gipas-an sa mga taga bukid nga miagi sa ilaha, nga unta anaa na man silay daghang natapok didto sa ilang   bodega?

Mitubag ang doktor: “Sila ang mga tawo nga angay tabangan. Kay nagpatulo gyod sa kaugalingon nilang singot aron may ikasarang sa pagpakig-away sa kawad-on. Di pareha anang uban, nga nagsalig lang sa pangayo.

Gimatuod sa doktor ang iyang kaluoy ngadto sa namaligyaay. Kon pilay presyo sa silhig, wala nay hangyohangyo. Kon may sukli, dili na niya kuhaon. Pun-an pa!

Kini, tungod kay kada adlaw mobasa man siyag mga verses sa bibliya ug segurado, nabangalan niya kini: “Mas dako ang kalipay sa mohatag kay sa madawat.” (Buhat 20:35). Mga pulong sa Ginoo nga may langitnong bili. Ug maoy gipuy-an sa higala kong mananambal ning kinabuhia.