Naghuwat nga ikiha

Daghan na ang niuli sa nadawat nila nga Social Amelioration Program (SAP) cash aid, apan duna pa gihapo’y wa gyud mouli ug tingali naghuwat nga ikiha sila kay midawat, o nakadawat bisan og disqualified.

Ang among treasurer sa Barangay Apas, Dakbayan sa Sugbo, mitug-an nga daghan na nga niuli, tingali iuli sab ni nila ngadto sa Department of Social Welfare and Development (DSWD).

Ambot kon tinuod ba nga diri gani sa among silingan, dunay magtiayon nga nakadawat ang asawa ug nakadawat usab ang iyang bana. Kini maoy usa sa gidili sa lagda.

Awhagon nako kadtong mga tawo nga nagtuo gyud nga sila angay’ng makadawat apan wa na makakuha og hinabang kay daghang disqualified nga mipugos gyud nga sila makakobra.

Usbon nako, ang nakahimo niini og dakong sayop mao ang mga kawani sa barangay nga gitugyanan sa pag-ila kon kinsa ang angayan nga hatagan.

Aw, hinuon mabasol sab ang mga kapitan kay nasipyat sila sa pagpili nga ang tahasan nila pag-abag sa DSWD mao kadtong ilang mga kawani nga dili bayas nga palabihon ang ilang mga amigo.

Law-ay kaayo hunahunaon uy nga ang kawani sa barangay nga gitugyanan sa pag-ila sa mga beneficiary, giapil hinoon ang iyang ngalan. Wa gyud tawon mauwaw nga mi-apply ug midawat og SAP assistance.

Nindot unta kon paspasan sa CIDG ug DSWD ang imbestigasyon aron pasakaan nila’g kaso kining mga mapahimuslanon sa higayon.

* * *

Nakaadto ko og usa ka lugar dinhi sa siyudad ug nahimamat nako ang akong mga karaang higala. Daghan man ang nalipay nga mitumaw kining Coronavirus Disease.

Abi ninyo og ngano? Daan na man nga wa sila’y trabaho bisan og wala pa ang COVID-19. Pagdeklarar nga ang siyudad ibutang sa Enhanced Community Quarantine, nakadawat sila og mga hinabang gikan sa kagamhanan.

Husto gyud diay ang giingon sa uban nga kadtong mga wa gyud maapektohi sa pagbutang sa siyudad ubos sa ECQ, dili unta apilon sa paghatag og tabang. Pero, lisud sab ang pag-ila kon DSWD ang moila nila no?

* * *

Ang kagamhanan dili na mohatag og tabang ngadto sa mga lumolupyo sa mga dapit nga gideklarar na nga General Community Quarantine.

Na hala, kamong mga naa sa mga dapit nga GCQ na, panarbaho na mo kay daghan man ninyo nga dili makahuwat nga hingpit na gyud unta nga mahanaw ang virus.

Ako, bisan og madeklarar pa nga GCQ ang dakbayan sa Sugbo, dili gihapon ko magpataka’g suroy, kay peligro nga naa pa ang virus ug matakdan ta.