EDITORYAL - Responsableng netizen

Dakop didto, dakop dinhi. Mao kini ang gihimo sa mga law enforcement units niadtong mga netizens nga nag-post sa social media pinaagi sa Facebook ug Twitter og gihulagway nga usa ka matang sa “pagpanghulga” sa kinabuhi ni Pres. Rodrigo Duterte. Didto sa Sta. Cruz. Zambales adunay lalaking magtutudlo nga gidakop tungod sa pag-awhag niya sa katawhan nga ipatay si Duterte ug hatagan niya ang makahimo niini og P50 milyones.

Sa Cordova dinhi sa Sugbo, usa ka 26 anyos nga babaye ang gidakop sa Criminal Investigation and Detection Group 7 Cebu Province Field Unit sa Barangay Ibabao lungsod sa Cordova tungod matud pa pagtanyag og P75 milyones  alang sa makapatay kang Duterte.

Dili lang kining duha ka insidente ang matud pa na-monitor sa mga otoridad diha sa internet tungod kay duna sab niini samang kaso sa Aklan ug Batanes.

Kagahapong adlawa, dunay gwardiya ug duha ka barangay tanod sa Ermita ang mitahan sa National Bureau of Investigation-7 aron paglimpyo sa ilang ngalan human gigamit ang ilang mga hulagway sa pagpanghulga kang Duterte diha sa Facebook. Ang mga gireklamong posts nagpadayag matud pa sa ilang dakong kayugot sa presidente tungod sa nahitabo karon sa Pilipinas.

Ang usa nangangkon nga gigamit ra iyang account sa laing tawo, samtang ang usa miangkon nga gusto lang siyang magpatagad.

Samtang dili katuohan kun duna ba gyuy kapasidad kining mga tawhana pagbayad sa ilang ganting gitanyag, apan paigo na ang ilang post aron sila mapasakaan og kaso.

Ang mga dinakpan kasohan og paglapas sa inciting to sedition ug cybercrime law. Ang sedisyon mao ang pag-awhag sa uban o publiko nga mag-alsa batok sa naglingkod nga gobiyerno o pamunoan. Kun kawani sa gobiyerno ang naghimo niini, duna pa kini laing kasong administratibang atubangon.

Hinuon ang korte nay maghukom kun ang ilang post makonsiderar lang nga “kagawasan sa pagpadayag” ug dili seryusong hulga o pagmugna og kagubot.

Magsilbi unta kining leksyon sa tanang netizens, mahimong responsable paggamit sa social media. “think before you click.”