EDITORYAL - Angay na bang mo-relax?

Angayan na bang paubsan ang gipatumang hugot nga protokol pinaagi sa enhanced community quarantine ngadto nalang sa general community quarantine sugod karong adlaw Mayo 16? Luwas na ba gyud ang mga Sugboanon gikan sa coronavirus disease?Nakab-ot naba gyud aning mga lugara ang gipaningkamotang “flattening of the curve” gikan aning dili makitang kaaway?

Sa pagkatinuod gikapoy na ang publiko sa nasinating kalisod sukad pa niadtong bulan sa Marso hangtud ning mga adlawa tungod aning coronavirus. Way pili kining sakita kay bisan kadtong wala niini matapti, nakasinati sab og grabeng kalisod. Numero unong nagrabehan ang mga kabus nga naa magpuyo sa mga depressed areas sa Cebu City, Mandaue City ug Lapu-Lapu City.

Maayo ang baroganan nilang Mandaue City Mayor Jonas Cortes, Lapu-Lapu City Mayor Junard “Ahong” Chan ug ni  Cebu City Mayor Edgardo Labella nga ang kaluwasan sa ilang mga konstituwente ang mas bug-at nga kinahanglang unahon ug ipadaplin lang una ang ahat nga pagpabangon sa ekonomiya. Tinuod, hasta ang gobiyerno gikapoy na niining problemaha gikan sa pagkombate sa sakit ngadto na sa paghatag og ayuda sa mga tawo.

Sa ilang gipagawas nga joint-statement, gihangop nila ang rekomendasyon sa Inter-Agency Task Force for Management of Emerging Infectious Diseases (IATF-EID) nga ipaubos nalang ang Mandaue City ug Lapu-Lapu City sa general community quarantine sugod Mayo 16.

Samtang ang Cebu City nga dunay kinadaghanan sa mga kaso sa maong virus magpabilin sa ECQ apan dunay modipikasyon sa mga protokol nga himuon.

Apan usa ray sigurado, kun ang lugar mapaubos na og GCQ, makapaabot gyud nga modaghan na sab ang mga tawo sa kadalanan ug sa samang higayon sa mga barangay.

Maglisud na og kontrol unya ang mga otoridad pagpatuman sa mga gidili tungod sa kadaghan na sa mga tawong bantayanan. Usa pa, mas daghan sa mga positibo ang asymptomatic, pila pa kaha ka mga susama nila ang wala pa masayod nga nagdala na sila ani nga sakit?

Gikinahanglan sa maong mga mayor ang kooperasyon sa publiko nga mopaubos gyud sa rapid testing tungod kay anhi mabasihan kun angayan na bang mo-relax o dili pa.