Inahan

Gisaulog kagahapong adlawa ang Adlaw sa Inahan o Mother’s Day diin tanan mitimbaya gyud ilabi na pinaagi sa social media nga nagbaha ang mga mensahe.

At least, natabonan kadyot ang mga balita mahitungod sa mga negatibong panghitabo karon kay nagpasulabi ang mga messages nga nagpahinumdum kon unsa kita kamapasalamoton sa nahimo sa atong mga inahan kanato.

Dili kita kakita sa kalibotan kon wala kita ihimugso sa atong inahan nga naghambin kanato sulod sa siyam ka buwan sa iyang sabakan hangtod na sa pagkahimugso ug pagdako. Karon sa atong nahimutangan kanunay gyud anaa kanato ang inahan sa atong kiliran, luyo ug atubangan o sa laktod nga pagkasulti iya kitang giduphan.

Ang adlaw sa inahan dili lang sa usa ka adlaw matag tuig dili kada adlaw tungod kay siya kanunay nagtukaw 24/7 gumikan sa iyang paghigugma sa mga anak.

Siya ang kusinira, labandera, yaya, hardenera all around ang iyang serbisyo nga wala magpaabot og sukli kay kini gihimo tungod sa gugma.

Tinood ang giingon nga bisan tagodtagoron pa ang atong lawas dili gyud kita makabayad sa sakripisyo nga gihimo sa atong inahan.

Subo palandungon nga pipila ka adlaw sa dili pa ang Mother’s Day adunay mga dili maayong panghitabo nga naglambigit sa inahan ug anak sama sa usa ka inahan nga gipatay sa iyang anak tungod kay kay nayawyawan niini ang anak isip pagbadlong nga dili pagawason tungod sa protocol karon.

Naa pay laing viral video nga usa ka lola ang gi-bully sa duha niya ka mga apo nga babaye, hinuon nangayo og pasaylo ang mga apo apan uwahi na ang tanan kay napasakitan na nila ang ilang apohan.

Ingon niini ka lampingasan kining mga klase sa anak o apo nga mohimo sa ingon, ambot tawo pa ba ni sila.

Ang Mother’s Day dili lang kutob sa mensahe apan gikinahanglan nga ipakita kini sa buhat pinaagi pag respeto sa mga inahan nga misugal sa ilang kinabuhi aron mabuhi ang mga anak.

Nabag-ohan ako karon kay unang Mother’s Day nga dili nako matimbaya ang akong mama Gaudencia kay mipauli namam siya sa balay sa atong Ginoo. Naa koy mga pagkuwang kaniadto nga gumikan sa ka busy sa panginabuhi dili mi pirme magkita apan siya maningkamot gyud nga maka-text kanako sa pagpangumusta.

Dili gyud masipyat kada adlaw siya ang mouna sa pag-text nga dili gani nako usahay mareplayan, busa i-cherish gyud sa mga anak ang panahon nga makauban pa ang atong Inahan.