Gikuyawan gyud ko

Napanglantawan nako nga pipila ka adlaw gikan karon, mosamot kadaghan ang mga positibo sa Coronavirus Disease o COVID-19 tungod kay ang katawhan mibaliwala na sa physical distancing kay nag-ilogay kinsa ang makapalista ug makakuha’g financial assistance sa Social Amelioration Program.

Grabeha uy, nakapanglingo-lingo ko nga nagtan-aw sa nagdasok na nga mga tawo nga nagsinardinas na lang gani sa paglinya aron makuha nila ang P6,000 nga hinabang gikan sa kagamhanan.

Nakalimot na sila nga angay gyud unta nga modistansya sila sa usa’g-usa.

Kon may pipila niadtong mga tawo nga nagdasok ug nag-ilogay nga makakuha og hinabang sa kagamhanan nga positibo sa COVID-19, sigurado nga magtakud-takod ang virus ug mosamot ang atubangon nga problema sa kagamhanan.

Dunay panultihon lagi nga “kapit patalim.”

Ang pagdagsang pag-ayo sa Coronavirus Disease tungod ra man usab kini sa kagahi pasabton sa daghang mga tawo.  Anaa sila manimuyo sa mga “slum areas,” sama sa Alaska, Mambaling, unya mibaliwala ra sa awhag nga mag-mask ug modistansya sa usa’g-usa.

Dunay mga positivo sa coronavirus nga nanggawas sa ilang kabalayan ug nagsayawsayaw pa sa karsada. Sa ilang gihimo tabla ra nga gisabwag nila ang virus. Tuod man, pagkasunod adlaw, kapin na sa 400 ka tawo ang positibo sa Covid diha sa maong slum areas sa Mambaling.

* * *

Awhag nako sa mga nagpuyo sa mga barangay nga wa pa kaayo makasulod ang coronavirus, dili nato sundogon ang gihimo sa ubang mga lumolupyo sa Mambaling.  Luoy tawon kaayo ang ubang nagpuyo sa Mambaling nga nagbinuotan, apan naamong sila sa ilang pipila ka silingan nga gahi kaayo pasabton ug mibaliwala sa awhag kanila sa kagamhanan.

Anugon kaayo ang kuwarta nga gigasto sa kagamhanan aron pagtubag sa panginahanglan sa katawhan nga apektado sa Corona Virus nga karon niabot na og binilyon ka pesos.

Sigurado ko nga daghang proyekto nga gitagan-an unta niining maong kuwarta aron unta mapahimuslan sa katawhan, ang dili na mapatuman.

* * *

May reklamo si kanhi mayor Tomas Osmeña nga gi-overpriced kuno ang pagpamalit og canned goods ug mga noodles nga gipanghatag sa mga tawo.

Gihagit siya ni Mayor Edgar Labella nga mopasaka og kaso. Nakita nako nga mahal ra gyud tinuod ang sardinas nga tag P21 kay tag P15 ngadto sa P16 ra man ang buok niini. Gibalikbalik na ni Mayor Labella nga dili gyud siya molaban kon may iyang sinaligan sa City Hall nga mipahimus sa higayon aron mabulsa nila ang dakong kantidad pinaagi sa overpricing.

Sige, mas maayo nga ipasaka ang kaso, apan siguro ko nga kon duna may nanguwarta sa mga opisyal sa City Hall, way labot niini si Mayor Labella ug giabuso ra siya sa iyang mga sinaligan.