Kumpetinsiya sa karne

Importante alang sa mga konsumidor nga dunay kumpetinsiya ang mga magpapatigayon aron dili magpatuyang sa presyo ang mga mapahimuslanong negosyante.

Sulod sa pipila ka buwan nga gipatuman ang pork ban dinhi sa Sugbo tungod sa hulga sa African Swine Fever (ASF) gikontrolar sa lokal nga mga magpapatigayon og baboy ang merkado.

Wala silay kumpitinsiya tungod kay dili makasulod dinhi sa Sugbo ang mga produkto sa baboy gikan sa Luzon ug Mindanao.

Resulta daghan dunay mga dealer og karne sa baboy nga nangreklamo tungod kay nisaka ang presyo sa karne.

Ang P130 nahimo na nga P170 ang kilo sa karne sa baboy sanglit wala na may kumpitinsiya. Ang makaluluoy mao intawon ang mga konsumidor.

Nisamot pagsaka ang presyo dihang miabot ang krisis sa COVID-19 tungod kay matud sa usa ka dealer niabot gyud og P300 ang kilo sa pork belly.

Mao nga dihang gilibkas ni Cebu City Mayor Edgar Labella niadtong dayong tapos sa buwan sa Abril ang ban sa mga karne sa baboy ug ubang pork products gikan sa General Santos City ug South Cotabato, daw sa nakapanghupaw sa kalipay ang mga negosyante og karne.

Makatabang ni aron mokunhod ang presyo niining panagon sa krisis.

Ang dakbayan sa Sugbo lang hinuon ang milibkas sa pork ban, apan maayo na ni nga sinugdanan.

Ang mga supplier og baboy gikan sa Gensan ug South Cotabato mipasalig nga luwas sa ASF ang ilang produkto.

Ang ilang kahugpongan, South Cotabato Swine Producers Association (SOCOSPA), pinaagi sa presidente nga si Ramil Lim miingon nga mas barato sab ang ilang karne.

Ilang gipaniguro nga duna silay igong supply alang sa dakbayan sa Sugbo aron makatabang pagsiguro nga dili magkuwang ang supply sa karne dinhi sa dakbayan niining panahon sa pandemic.

Importante ang supply sa mas baratong pagkaon karong panahona busa kun wala nay hulga sa ASF ang mga produkto gikan sa Gensan ug South Cotabato angayan tingali nga atong dawaton ang ilang supply aron makatabang sa panginahanglan sa mga Sugboanon.

Ang Department of Agriculture miluwat na og certification nga luwas sa ASF ang mga produkto gikan sa maong bahin sa Mindanao.