EDITORYAL - Pagbantay mga kapitan

Magatubang karon og dakong problema kining mga barangay opisyales nga gipasanginlang naghimo og iregularidad sa pagpanghatag sa social amelioration program sa DSWD ngadto sa mga benepisaryong apektado sa krisis dala niining coronavirus (COVID-19).

Sa social media, daghang mga alegasyon ug mga akusasyon batok sa mga barangay officials nga duna silay gipalabi sa pagpili kun kinsa sa ilang konstituwente ang maapil sa lista nga pahatagan sa SAP.

Ang mga barangay officials gitahasan lang pagtabang sa mga representante sa DSWD kun kinsa ang mga “poorest of the poor” sa ilang lugar. Tinuod nga ang mga social welfare officers nga nadestino sa barangay maoy  gitahasan sa pag-verify kun unsa ka tinuod ang mga impormasyon sa kada benepisaryo, apan ang barangay officials gihapon maoy magukod kay sila maoy miila aning mga tawhana.

Karon daghan sa mga nanggawas nga reklamo diha sa social media namasangil nga kadto rang duol sa luwag maoy nahatagan ilabi na kadtong mga kadugo sa kapitan ug barangay officials.

Ang kalihim sa Department of the Interior and Local Government Eduardo Año kagahapong adlawa, mimando sa Philippine National Police ug mihangyo sab sa National Bureau of Investigation pagsusi aning mga alegasyon batok sa mga barangay officials.

Siguradong gipangulbaan kining mga kapitan ug barangay officials, bisan kadtong mga nagtarong sa pagsunod sa patakaran sa SAP distribution possible sab nga maimbestigar, kay siguro man gyud nga adunay mga kritikal kanila nga mga konstituwente ang maghimohimo og pasangil batok kanila.

Kaning awhag sa Malacañang sa publiko pagsumbong pinaagi sa 8888 Hotline kun kinsa ang mga barangay officials nga nangurakot sa SAP dako og matabang apan makamugna sab og dakong problema sa mga nagtinarong kay dali kining abusohon ilabi na nga adunay ganti nga P30 mil sa mga mosumbong.

Aron di kini abusahan, mas maayong kuhaan og pangalan, address ug ilista sa lokal nga presinto sa kapolisan kadtong mga mopadangat og reklamo aron kun binuang ra kini o pagpangdaut, dunay magukod ang mga kapitan.