Nagkamang nga hinabang

Bisan pa sa halapad nga paningkamot nga malukop gayud tanan nga mahatagan sa hinabang gikan sa kagamhanan niining krisis sa Coronavirus Disease o COVID-19, daghan gihapon ang mipiyait ug nagbagulbol.

Unsaon man gud, dili tanan ang nakadawat niini. Adunay uban nga bisan piso wala gyuy nadawat, ilabina niadtong tua nagpuyo sa layo nga lugar nga wala na maapil sa listahan DSWD sa mga benepisaryo sa Social Amelioration Program o SAP sa kagamhanan.

Unsa bay ipasabot niini? Nga nagkulang ang mga hingtungdan ahensiya sa kagamhanan sa paningkamot pag-apod-apod sa hinabang alang niadtong apektado sa Enhanced Community Quarantine gumikan sa COVID-19?

Morag gikumot akong dughan niadto’ng gi-feature sa telebisyon kabahin sa usa ka molupyo didto sa Davao kinsa naghilak nga nagkagod kay lubi na lang lagi ang ilang gikaon gumikan kay wala na silay malung-ag ug nga wala silay nadawat nga ayuda gikan sa gobiyerno.

Kun asa nga ahensiya sa nasyonal nga kagamhanan o sa lokal nga panggobiyerno ang responsable sa problema sa kalangay sa ayuda, angay lamang sila nga manubag sa katawhan. Kini tungod sa ka palpak sa ilang trabaho.

* * *

Hinaut nga dili usab magpalabi og pamolitika kining ang atong mga nasyonal ug lokal nga mga opisyales niining pagpang-apod-apod sa hinabang ngadto sa katawhan nga grabeng naapektohan karon sa Coronavirus Disease.

Daghan kaayong reklamo nga mosalga usab ang mga gobernador, mayor, konsehal ug mismo ang barangay captain atol sa distribution sa mga hinabang ngadto sa katawhan, ilabina na inadtong mga pobreng molupyo.

Pananglitan, daghan nang kaso nga nahitabo nga kun dili ka duol sa luwag, ambot pa kun maapil ka ba sa lista. Ug kun maapil man gani, sigurado usab nga mangiwit ang imong ngalan sa listahan sa mga benepisaryo.

Angay nga hinumdoman niining atong mga opisyal nga kwarta kana gikan mismo sa mga magbubuhis ang maong ayuda nga gisabwag ngadto sa katawhan. Ug usa ka dakong kalapasan kun mo-starring pa sila ug magpa-epal sa distribusyon niini. Niining panahon sa dakong krisis mugna sa coronavirus, angay nga idiritso ngadto sa nanginahanglan ang ayuda gikan sa kagamhanan. Wala man siguroy dautan kun mosalga ang atong mga lideres basta ang tumong mao ang pagpadali sa maong hinabang mga maabot ngadto sa hingtungdan.