Kun ugaling sihag na ang tanan

Dunay hugonhugon nga kining maong kasinatian nato karon sa coronavirus mao man ang sinugdanan sa lain pang mga hitabo sa umaabot. Kining maong mga hitabo dili lang kutob sa pandemic sama sa coronavirus kondili hasta na usab sa atong umaabot nga ekonomikanhong pagkinabuhi. Unsay buot ipasabot niini? Kabahin sa laraw sa mga gamhanan kining mosunod:

1. One World Government nga sa ato pa mahimong mahanaw na ang individual nga nasud ingon nga dunay gahum alang sa kaugalingon kay masuyop naman sila sa bag-ong world order sa umaabot. Kining maong world order apil na ang pagpalusot sa gitawag natong Id2020 diin matag tawo rehistrado na sa usa lamang  ka tinubdan sa mga datos. Digitized ang paagi sa maong pag rehistro. Sa ato pa, dali kaayo ka i-trace, ug wala ka nay privacy.

2. Crypto currency maoy paagi nga mawala na sa hingpit ang atong mga tagsatagsa ka mga currency sa mga nasud sa tibuok kalibutan. Bugtong usa na lamang ka currency ang gamiton diin kun wa ko masayop daw mura na lang og points nga makuhaan every time nga duna tay panginahanglan.

Ning maong kalaki, dili na kita makapalit ni makahupot og salapi ug ang tanan ipaagi na lang sa crypto currency diin ang usa lamang ka pangobiyerno maoy maghupot sa datos. Ang tanan mamahimong sihag kun transparent. Kun unsay imong transaction, ang tanan mahimong makita ginamit ang internet. Sa laktod ang tanan sihag kun transparent.

Sa akong panlantaw niini mamahimong kita mismo ang dili makalihok segun sa atong kabubut-on kay ang World Order mao naman ang magbuot kun unsay atong himoon o unsay atong pagadangatan. Ang mosupak mamahimong gukdon. Ug dili lang kay pipila ang mogukod nimo kondili ang tibuok kalibutan maoy mogukod aron ka lutoson.

Busa ang pangutana mao: "Andam ka bang mahitabo na kini kanimo?"