Legal na politikal

Mobawos sa pagpasaka og kaso batok kang Cebu City Mayor Edgardo C. Labella ang magpapatigayon ug artist nga si Maria Victoria “Bambi” Beltran tungod sa paglapas kuno sa iyang katungod human siya gidakop ug gipriso sa mga polis. Kini tungod usab sa pasangil nga nakalapas siya sa Cybercrime Law, fake news provision sa Bayanihan Heal As One Law ug sa balaud on mandatory reporting of certain diseases.

Gireklamo sa mga abogado ni Beltran nga sila si Amando Virgil Ligutan ug Ben Militar sa Free Legal Assistance Group o FLAG ang paglapas sa mga polis sa iyang katungod nga gilatid sa Akta Republika 7438 o Custodial Investigation Law.

Section 2 sa nahisgotang balaud nagkanayon nga si kinsa kadtong gidakop ug gipriso o ubos sa imbestigasyon kinahanglan nga pagaabagan kini sa iyang abogado sa tanang panahon.

Gihulagway sa mga abogado nga kalapasan sa katungod ni Beltran ang wala pagtugot kanila nga makasulod sa Cebu City Police Office holding area tungod sa presensiya ni Mayor Labella. Si Ligutan mireklamo nga gilapas sa mga polis ang katungod sa ilang kliyente dihang gitugotan niini si Mayor Labella nga makasulti si Beltran nga wala ang ilang presensiya.

Sa akong tan-aw mahimong politikal ang kasong legal ni Beltran. Kun wala ko masayop kining duha ka abogado nga gikan sa FLAG nga nangabogar ni Beltran mga iladong abogado ni kanhi Mayor Tomas Osmena. Busa maingon nato nga kining mga abogado nga mitabang ni Beltran dili lang gikan sa Free Legal Assistance Group kun gikan usab sa kampo ni Osmeña.

Tungod sa presensiya niining duha ka abogado nga kanunay nga naghupot sa mga kaso ni Osmeña dili nato masalikway ang posibilidad nga maputos sa kolor sa politika ang kasong legal ni Beltran.