Mura og ipatuman sa nasudnong kagamhanan ang mura og Martial Law nga pamaagi tungod sa kadaghang tawo nga wala motuman sa gipatuman nga Enhanced Community Quarantine didto sa kaulohan.
Tungod niini, mura na unya og makita sa kadalanan ug ubang dapit didto sa kaulohan ang mga sundalo nga mura na og motabang sa kapolisan sa pagpatuman sa Enhanced Community Quarantine.
Mura og dunay basihanan si Presidente Rodrigo Duterte kon iyang isugo ang mura og Martial Law nga paagi sa pagpatuman sa Enhanced Community Quarantine.
Basi sa Section 6 sa Article VII sa 1986 nga Batakang Balaud sa Pilipinas, ang Presidente adunay tulo ka mga gitawag nga gahum militar nga mao kining mosunod: Una, calling out power o gahum sa Presidente nga matawag ang mga sundalo aron mapakgang ang kagubot, miataki nga kontra sa nasud ug mga nagrebelde. Ikaduha, Pagsuspenso sa pribilihiyo sa Writ of Habeas Corpus ug ang ikatulo mao ang pagpakanaug o pagpaubos lukop nasud o bahin niini sa Martial Law o balaud militar.
Mura og motukma sa atong kahimtang karon ang unang gahum militar ni Presidente Rodrigo Duterte. Wala man tuod kaguliyang nga nahitabo sa kaulohan apan giataki kita sa Coronavirus Disease 19 nga miataki na sa sobra unom ka libo ka mga tawo sa Pilipinas ug hapit na moabot sa lima ka gatos ang napatay niini basi sa datus sa Department of Health nga ilang gipagawas niadtong adlaw nga Domingo. Hangtod karon padayon pa kitang nag-ihap sa mga naigo sa virus, sa mga namatay ug mga nakalingkawas sa ataki sa virus.
Ang Coronavirus Disease 19 nga miataki sa nasud mura sama usab og mga sundalo sa kontrang nasud nga miataki sa nasud busa haum ug tukma lamang nga ipatuman ni Presidente Rodrigo Duterte ang mura og Balaud Militar o Martial Law nga paagi sa pagpatuman sa Enhanced Community Quarantine.